काठमाडौँ । जिल्ला प्रहरी परिसर काठमाडौंले ललितपुरको झम्सीखेलस्थित जनआस्था साप्ताहिकको कार्यालयमा छापा मारेको छ । छापामा मारेर पत्रिकाका कम्प्युटर (सीपीयू, मनिटर) तथा अन्य डिभाइसहरू नियन्त्रणमा लिएको छ ।

पत्रिकाका सम्पादक किशोर श्रेष्ठलाई वैयक्तिक गोपनीयतासम्बन्धी ऐन, २०७५ विपरीतको कसुर गरेको आरोपमा बुधवार उनकै निवासबाट पक्राउ गरेको थियो ।

जिल्ला प्रहरी परिसर काठमाडौंका प्रवक्ता एसवी दानबहादुर थापाले अनुसन्धानका लागि कम्प्युटर र डिभाइसहरू नियन्त्रणमा लिइएको जानकारी दिएका छन् । पत्रकार श्रेष्ठलाई जिल्ला प्रहरी परिसर, काठमाडौंकै हिरासतमा राखिएको छ । आज अदालतमा उपस्थित गराइने बताइएको छ ।

यता नेपाल पत्रकार महासंघले श्रेष्ठ पक्राउको विरोध गरेको छ । प्रहरीले समाचार प्रकाशन गरेकै भरमा पत्रकारलाई पक्राउ गर्नु प्रेस अभिव्यक्ति स्वतन्त्रतामाथि हस्तक्षप भन्दै महासंघले श्रेष्ठलाई तत्काल रिहा गर्न माग गरेको छ । महासंघले आज भद्रकालीस्थित काठमाडौं प्रहरी परिसरमा धर्ना दिने कार्यक्रम तय गरेको छ ।

सञ्चारमाध्यममा प्रकाशित समाचारमा चित्त नबुझे प्रेस काउन्सिलमार्फत कानुनी बाटो खोज्ने व्यवस्था छ । तर प्रहरीले त्यो व्यवस्थाको धज्जी उडाउदै पत्रकार श्रेष्ठलाई पक्राउ गरेको हो ।

रोल्पा । वर्षापछि खसेको पहिरोले रोल्पामा घरगोठ पुरिँदा दुई जनाको मृत्यु भएको छ । पहिरोमा परी दुई जना गम्भीर घाइते छन् । थवाङ गाउँपालिका–५ बोटलबारामा पहिरोले ६ वटा घर गोठहरु पुरिंदा अरु १० जना बेपत्ता भएका छन् ।

बुधवार बेलुकी पौने ९ बजेतिर खसेको पहिरोमा परी १८ वर्षीया शान्ति पुन मगर र ६० वर्षीय कमलबहादुर पुन मगरको मृत्यु भएको प्रहरीले जनाएको छ ।

पहिरोमा परी घाइते २२ वर्षीय हिमाल पुन मगर र २५ वर्षीय सन्जय घर्ती मगरलाई गम्भीर अवस्थामा उद्धार गरिएको प्रहरीले जनाएको छ । जिल्ला प्रहरी कार्यालय रोल्पाका प्रहरी निरीक्षक कृष्ण श्रेष्ठका अनुसार घटनास्थल विकट रहेकाले घटनाको थप विवरण संकलन भइरहेको छ।

काठमाडौं । बुधबार साँझ जनआस्था साप्ताहिकका सम्पादक तथा आस्था मिडियाका अध्यक्ष किशोर श्रेष्ठलाई समाचार प्रकाशनको विषयलाई लिएर प्रहरीले पक्राउ गरेपछि पत्रकारिता क्षेत्र आन्दोलित भएको छ।

ललितपुरको नख्खुस्थित आफ्नै निवासबाट बुधबार साँझ पक्राउ परेका श्रेष्ठलाई काठमाडौं प्रहरी परिसरको हिरासतमा राखिएको छ। प्रहरीले जनआस्था साप्ताहिकमा प्रकाशित समाचारलाई लिएर उनलाई पक्राउ गरेको हो ।

पत्रकार श्रेष्ठको पक्राउको विरोधमा पत्रकार महासंघकी अध्यक्ष निर्मला शर्मा, प्रेस चौतारी नेपालका अध्यक्ष गणेश पाण्डेलगायत पत्रकार तथा सञ्चारकर्मीहरू काठमाडौं प्रहरी परिसर पुगेका थिए। उनीहरूले परिसर अगाडि नाराबाजी गर्दै श्रेष्ठको तत्काल रिहाइको माग गरे।

पत्रकारहरूले समाचार प्रकाशनको विषयलाई लिएर सम्पादकलाई पक्राउ गर्नु प्रेस स्वतन्त्रतामाथिको हस्तक्षेप भएको बताएका छन्। उनीहरूले समाचारमा चित्त नबुझे कानुनी तथा प्रेससम्बन्धी स्थापित प्रक्रियाबाट समाधान खोज्न सकिने भन्दै पत्रकारलाई नै पक्राउ गरेर हिरासतमा राख्ने कार्य स्वीकार्य नहुने बताएका छन्।

चार दशकदेखि पत्रकारितामा सक्रिय श्रेष्ठको नेतृत्वमा रहेको जनआस्था मिडियाले तीन दशकभन्दा लामो समयदेखि विभिन्न राजनीतिक, प्रशासनिक तथा सार्वजनिक क्षेत्रमा हुने अनियमितता र गैरकानुनी गतिविधिलाई समाचारमार्फत उजागर गर्दै आएको छ।

प्रेस तथा अभिव्यक्ति स्वतन्त्रताको संवैधानिक अधिकारमाथि कुनै पनि प्रकारको हस्तक्षेप हुन नहुने भन्दै पत्रकार महासंघलगायतका संस्थाले सरकार र सुरक्षा निकायको ध्यानाकर्षण गराएका छन्। उनीहरूले पत्रकारलाई निर्भीक रूपमा समाचार लेख्ने र प्रकाशित गर्ने वातावरण बनाउनसमेत माग गरेका छन्।

बाँके । ग्याँस लुकाएर राख्ने नेपालगञ्जका एक व्यवासायीलाई ५० हजार जरिवाना गरिएको छ । ग्याँसको अभाव भए–नभएको अनुगमन गर्न निस्किएको बजार अनुगमन समितिले नेपालगञ्ज उपमहानगरपालिका–११ त्रिभुवन चोकस्थित सदरलाइनमा रहेको एक किराना पसलमा ग्याँस लुकाएर राखेको भेटिएपछि व्यवसायीलाई कारबाही गरेको हो ।

नेपालगञ्ज–११ त्रिभुवनचोकस्थित शंकर दयाल बद्रीप्रसाद प्रोभिजन स्टोरले ग्याँस लुकाएर उपभोक्तालाई बिक्री नगरेको पाइएपछि ५० हजार रुपैयाँ जरिवाना गरिएको अनुगमन समितिका संयोजक तथा बाँकेका सहायक प्रमुख जिल्ला अधिकारी महेशकुमार गुरुङले जानकारी दिए ।

उनका अनुसार बजार अनुगमनका क्रममा उक्त पसलमा १३ वटा ग्याँस सिलिन्डर लुकाएर राखेको भेटिएको थियो । पहिलो पटकका लागि चेतावनीसहित ५० हजार जरिवाना गरिएको सहायक प्रमुख जिल्ला अधिकारी गुरुङले बताए ।
यसरी ग्याँस सिलिन्डर लुकाएर राखेको पाइएपछि प्रचलित व्यवस्थाअनुसार पसललाई ५० हजार जरिवाना गरिएको समितिले जनाएको छ ।

फारम भर्न राष्ट्रिय परिचयपत्र र आफ्नै मोबाइल नम्बर
काठमाडौँ । यातायात व्यवस्था विभागले सवारी चालक अनुमतिपत्र (लाइसेन्स) लगायत यातायात सम्बन्धी सेवामा नयाँ अनलाइन प्रणाली कार्यान्वयनमा ल्याएको छ । यातायात सम्बन्धी सेवालाई थप व्यवस्थित गर्न २०८३ साउन १ गते देखि लागु भएको नयाँ प्रणाली कार्यान्वयनमा ल्याएको हो ।

नयाँ प्रणालीमा लाइसेन्सको नयाँ फारम भर्न र विवरण अद्यावधिक गर्न राष्ट्रिय परिचयपत्र, आफ्नै नाममा रहेको मोबाइल नम्बर र इमेल अनिवार्य गरिएको छ ।

सर्भर अपग्रेड र नयाँ प्रणाली लागु गर्ने सन्दर्भमा सिस्टम डाउन भएर देशभरका यातायात कार्यालयमा साउन १ गतेदेखि करिब ३ साता यातायात सम्बन्धी सबै सेवा रोकिएका थिए । तर अहिले सेवा सञ्चालनमा आइसकेको यातायात व्यवस्था विभागका निर्देशक केशव खतिवडाले बताएका छन् ।

विभागका अनुसार नयाँ अनलाइन प्रणालीलाई नागरिक एप, राष्ट्रिय परिचयपत्र तथा मोबाइल फोन सेवा प्रदायकको प्रणालीसँग एकीकृत गरिएको छ । अब नागरिक एपमार्फत सेवाग्राहीको विवरण स्वतः भरिने व्यवस्था मिलाइएको छ ।

सेवाग्राहीले आफ्नो विवरण अद्यावधिक गर्न वा नयाँ आवेदन दिन राष्ट्रिय परिचयपत्र नम्बर, आफ्नै नाममा दर्ता भएको मोबाइल नम्बर र इमेल अनिवार्य रूपमा संलग्न गर्नुपर्नेछ ।

सात प्रदेशका छुट्टाछुट्टै वेबसाइट

नयाँ प्रणाली कार्यान्वयनसँगै विभागले प्रदेश अनुसार अनलाइन फारम भर्न छुट्टाछुट्टै वेबसाइट सञ्चालनमा ल्याएको छ । सेवाग्राहीले अब आफूलाई पायक पर्ने प्रदेशको लिंकमा गएर फारम भर्न सक्नेछन् ।

कोशी प्रदेश : edlvrs.koshi.gov.np

मधेश प्रदेशः edlvrs.madhesh.gov.np

बागमती प्रदेशः edlvrs.bagamati.gov.np

गण्डकी प्रदेशः edlvrs.gandaki.gov.np

लुम्बिनी प्रदेशः edlvrs.lumbini.gov.np

कर्णाली प्रदेशः edlvrs.karnali.gov.np

सुदूरपश्चिम प्रदेशः edlvrs.sudurpashchim.gov.np

काठमाडौँ । सङ्घीय संसद्, प्रतिनिधिसभाको बैठक आज दिउँसो १ बजे बस्दैछ। सिंहदरबारमा बस्ने बैठकमा खानी तथा खनिज पदार्थ विधेयक, २०८३ माथि विचार गरियोस् भन्ने प्रस्ताव पेस गर्ने कार्यसूची छ।

उद्योग, वाणिज्य तथा आपूर्तिमन्त्री गौरी कुमारीले उक्त प्रस्ताव प्रस्तुत गर्ने सम्भावित कार्यसूची छ। यस्तै, आजै दुई वटा संसदीय समितिको बैठक बस्दैछ।

सङ्घीय संसद् सचिवालयका अनुसार, सार्वजनिक लेखा समिति र विकास आर्थिक मामिला तथा सुशासन समितिको बैठक बस्ने कार्यसूची छ।

बुटवल । गएको शुक्रवारदेखि सम्पर्कविहीन भएका कपिलवस्तु नगरपालिकाका पूर्वमेयर किरण सिंह मृत फेला परेका छन् । सिंहको शव जिल्लाको गोरुसिंगे जंगलमा आज फेला परेको हो ।

सिंह शुक्रबार अन्दाजी २ बजेतिर कपिलवस्तु–३ स्थित घरबाट निस्किएका थिए । पूर्वपश्चिम राजमार्गबाट करिब आठ किलोमिटरभित्र जंगल क्षेत्रमा उनले चढ्ने गरेको लु प्र ०१०१३ प ७९७० नम्बरको मोटरसाइकल रोकिराखेको अवस्थामा भेटिएको थियो ।

वेपत्तापछि प्रहरीले तालिम प्राप्त कुकुरसहित खोजी कार्यलाई तीब्र बनाएको थियो । अन्तः ६५ वर्षीय सिंह जंगलमा मृत फेला परेका छन् । घटनाको थप अनुसन्धान भइरहेको प्रहरीले जनाएको छ ।