काठमाडौं,११ साउन । गएराति देखि परेको अविरल वर्षाले मादी नदीमा बाढी आएपछि कास्कीको पार्चे(१ सोँधा गाउँको थप तीन घर बगाएको छ । वर्षासँगै मादी नदीमा बाढी आएपछि मादिले कटान गर्दा स्थानीय अशोक भुजेल र बालसिहं भुजेलको घर बगाएको स्थानीय यमन गुरुङले जानकारी दिए । उनका अनुसार बाढीले स्थानीय क्लिनिक र विद्यालयको पुरानो भवन पनि बगाएको छ ।
गुरुङले स्थानिय आशमाया गुरुङ, पुष्पा गुरुङ, गोपाल गुरुङ, तुलसी घर्ती, चित्रकुमारी गुरुङ, भौमाया क्षेत्रीको घर पनि जोखिममा परेको बताए । उनीहरु घरमा बस्ने स्थिती नभएपछि गाउँ भन्दा माथि रहेको दुधपोखरी माविमा आश्रय लिएर बसिरहेको गुरुङले जानकारी दिए । बाढीले खेतीयोग्य जमिन समेत कटान गरेको छ । नदीको कटान बढ्दै गएकाले जोखिम निकै बढेको उनले बताए ।
