इन्द्रेणी संवाददाता
दाङ, २ साउन ।
कमैया मुक्ति दिवस आज मनाईंदैछ । सरकारले कमैया मुक्ति घोषणा गरेको आज १७ वर्ष पूरा भएपनि अझैसम्म पनि उनीहरुको उचित पुनस्र्थापन हुन सकेको छैन ।
लामो समयदेखि अर्काको घरमा काम गरेर बस्न बाध्य कमैयालाई सरकारले २०५७ साल साउन २ गते मुक्त भएको घोषणा गरेको थियो । दाङ्ग, बाँके, बर्दिया, कैलाली र कञ्चनपुरमा रहेका कमैयालाई मुक्त भएको घोषणा गरी कमैयाले लिएको ऋण मिनाहा गर्दै कुनै व्यक्तिलाई कमैया श्रमिकको रुपमा प्रत्यक्ष वा अप्रत्यक्ष रुपमा काममा लगाउन प्रतिबन्ध लगाएको हो ।
सरकारले मुक्त कमैयाको बसोबासको व्यवस्था मिलाउनुका साथै घर निर्माण खर्च, काठ तथा विभिन्न सीपमूलक तथा आयमूलक कार्यक्रम सञ्चालन गरिरहेको बताएको छ । कैलाली र बर्दियामा पुनस्र्थापनाको काम बाँकी रहेको मुक्त कमैयाहरुले बताएका छन् ।।
