भक्तपुर, २६ असार । शिक्षक सेवा आयोगले लिने परीक्षाको पाठयक्रम तत्कालै फेरबदल नहुने भएको छ । शिक्षा ऐन संशोधन पछि पनि आयोगले लिने परीक्षाको पाठ्यक्रम तत्कालका लागि नफेरिने आयोगले जनाएको छ ।
आयोगका प्रवक्ता सुदर्शन मरहठ्ठाले शिक्षक सेवा आयोगले शिक्षा सेवा नियमावली अनुसार पाठ्यक्रमलाई समय सापेक्ष परिवर्तन गरेको भन्दै तत्कालका लागि पाठ्यक्रम फेरबदल नगर्ने बताउनुभयो । उहाँले शिक्षा ऐनमा शिक्षक सेवा आयोगको पाठ्यक्रमको बारेमा कुनै वुँदा उल्लेख नभएको बताउँदै पाठ्यक्रम बारेमा अहिले कुनै प्रसंग नउठेको पनि बताउनुभयो । उहाँले विभागले शिक्षा ऐन संशोधन हुनुपूर्व नै नियमावलीका अधिनमा रहेर विज्ञापन गरेको बताउँदै त्यही आधारमा परीक्षा हुने बताउनुभयो । पाठ्यक्रमको बारेमा शिक्षा विभागले आगामी दिनमा बनाउने नियमावलीले निर्धारण गर्ने पनि उहाँले बताउनुभयो ।।
