काठमाडौं,२४ असार । आफु प्रहरी नभएपनि ‘प्रहरी हुँ’ भन्दै काठमाडौंमा ठग्दै हिँड्ने सिन्धुपाल्चोकका नारायण बिकलाई प्रहरीले पक्राउ गरेको छ । काठमाडौं उपत्यकाका बसपार्क लगायतका स्थानहरुमा रहेका पसलहरुमा मोवाईल तथा पैसा चोरी गरेको सुचनाका आधारमा महानगरीय प्रहरी अपराध महाशाखाले दिपेन्द्र अधिकारी भन्ने नारायण विकलाई पक्राउ गरेको हो ।
काठमाडौंको नागार्जुन–४ बाट समातिएका विकले यसअघि पनि पटक–पटक ठगी गरेर धरौटीमा रिहा भएको प्रहरीले जनाएको छ । उनको साथबाट सामसुङ ग्यालेक्सि जे सेभेन मोवाईल सेट एकथान बरामद गरिएको प्रहरीले जनाएको छ । हाल सितापाईल बस्दै आएका विकले नक्कली नागरीकता बनाएर ठगी गर्ने गरेको प्रहरी अनुसन्धानबाट खुलेको छ ।
