इन्द्रेणी संवाददाता
घोराही, फागुन १६ – चर्चित लोकगायिका कला लम्सालले घोराही महोत्सवमा दमदार प्रस्तुति दिएकी छन्। गोधुली साँझ हुनै लाग्दा स्टेजमा पुगेकी लम्सालले एकपछि अर्को हिट गीत गाएर दर्शकलाई नाच्न बाध्य पारिन्।
उनले आफ्नो प्रस्तुति लोकप्रिय गीत ‘नाकै हेर्दा थाहा हुने’ बाट सुरु गरिन्। उनको स्वर गुञ्जिएसँगै दर्शकहरू उठेर छमछमी नाच्न थाले। करिब आधा दर्जन चर्चित गीतहरू गाएर उनले उपस्थित दर्शकलाई झुमाइन्। विशेषगरी, पञ्चेबाजा भाकामा आधारित गीतहरूले माहोल झन् रोमाञ्चक बनायो।
नेपालको लोकसंस्कृति विदेशसम्म पुर्याएकी लम्साल आज भने दङाली दर्शकलाई आफ्नै भाकामा नचाउन सफल भइन्। दर्शकहरू हात हल्लाउँदै, ताली बजाउँदै उनको प्रस्तुति रमाइलो गर्दै थिए।
महोत्सव आयोजक समितिले स्थानीय तथा राष्ट्रिय कलाकारहरूको आकर्षक प्रस्तुति मार्फत महोत्सवलाई थप मनोरञ्जनात्मक बनाउन खोजेको जनाएको छ। आयोजकका अनुसार, लम्सालको प्रस्तुति महोत्सवकै सबैभन्दा रोचक क्षणमध्ये एक रह्यो।
यस महोत्सवमा सांगीतिक प्रस्तुति मात्र नभई कृषि प्रदर्शनी, व्यापारिक स्टलहरू, खाद्य मेला, र बालबालिकाका लागि खेलकुद कार्यक्रमहरू पनि समावेश छन्।
लोकप्रिय गायिका लम्सालको धमाकेदार प्रस्तुति पछि, महोत्सवमा अन्य चर्चित कलाकारहरूको पनि सहभागिता रहने आयोजकले जनाएको छ।
