दाङ । नेपाल पत्रकार महासंघका निवर्तमान केन्द्रीय अध्यक्ष विपुल पोख्रेलले हालै राष्ट्रिय सभामा पेश भएको सामाजिक सञ्जाल नियन्त्रण सम्वन्धी विधेयक खारेज हुनुपर्ने बताएका छन् ।

नेपाल प्रेस युनियन दाङको २७ औँ साधारणसभालाई सम्बोधन गर्दै निवर्तमान अध्यक्ष पोख्रेलले नागरिकलाई सामाजिक सञ्जालको असल अभ्यास गर्न अभिप्रेरित गर्ने भन्दा अपराधी करार गर्ने हिसाबले ल्याइएको विधेयकको औचित्य नभएको भन्दै खारेजी हुनुपर्ने बताए ।

नेपालको संविधानले प्रदत्त गरेका कानुनका माध्ययमबाट सामाजिक सञ्जाललाई मर्यादित बनाउने प्रसस्त ठाँउ रहेको भन्दै अभिव्यक्ति स्वतन्त्रता कुण्ठित गर्नेगरी जवरजस्ती ल्याउन खोजेको यसखालको कानुन आएमा त्यसको पूर्णरुपमा अवज्ञा गरिने र सबै पत्रकारहरु सडकमा आउने चेतावनी दिए ।

फौजदारी कानुन ल्याएर विरोधका स्वरलाई दवाएर जाने सरकारको सोच देखिएको भन्दै कार्यक्रमका प्रमुख अतिथि निर्वतमान अध्यक्ष पोख्रेलले व्यक्ति हत्या गरेका अपराधीलाई जस्तैगरी दोषी करार गर्ने मनसाय लोकतान्त्रिक सरकारको असल अभ्यासभित्र नपर्ने बताए ।

नेपाल प्रेस युनियन दाङका अध्यक्ष नारायण खड्काको अध्यक्षतामा भएको कार्यक्रममा विशिष्ट अतिथि प्रेस युनियनका लुम्बिनी प्रदेश अध्यक्ष डा. सुदिप गौतमले संचार क्षेत्रलाई नियमन गर्ने विधेयक सरोकारवालाहरुसंगको सरसल्लाह र सुझाव बिना ल्याएर सरकार स्वच्छाचारी ढंगले अघि बढेको बताए ।

कार्यक्रमा नेपाल पत्रकार महासंघ दाङका अध्यक्ष सन्तोष सुवेदी, महासघका केन्द्रिय सचिव सविन सप्रियासन, लुम्बिनी प्रदेश महासचिव पाण्डबप्रसाद शर्मा, नेपाल प्रेस युनियनका केन्द्रिय सदस्य देवेन्द्र बस्नेत, चेतन रेग्मी, लक्ष्मीमान चौधरी, नेपाल प्रेस काउन्सिलका सदस्य शरद अधिकारी, प्रेस चौतारी दाङका अध्यक्ष प्रेमबहादुर राम्जा, जनपत्रकार संगठनका उपाध्यक्ष जंग रेउले, रिपोर्टस क्लब दाङका अध्यक्ष शरद रेग्मी, व्याव्सन दाङका सचिब आदिम केसी लगायतले शुभकामना ब्यक्त गरेका थिए ।

साधारण सभामा नेपाल प्रेस युनियन दाङका सचिब अमर क्षितिज भण्डारीले पेश गरेको सचिवको सांगठनिक प्रतिवेदन र कोषध्यक्ष लिलाधर वलीले प्रस्तुत गरेको आर्थिक प्रतिवेदनलाई बन्दशत्रले सभासदहरुबाट आएका सुझाबहरुलाई समेटी पारित गरेको छ । साभारण सभाले नेपाल प्रेस युनियनमा पनि शुद्धिकरण आवश्यक रहेकाले निष्कर्षका साथ आगामी दिनमा शुद्धिकरणको अभियानलाई अगाडि बढाउने निर्णय गरेको छ । कार्यक्रममा नेपाल प्रेस युनियनका उपाध्यक्ष गोपाल शर्मा भट्टराईको स्वागत र उपाध्यक्ष किरण बिक्रम शाहले धन्यवाद ज्ञापन गरेका थए ।