काठमाडौं । यसअघि साउन १८ र १९ गते गर्ने भनिएको माध्यमिक शिक्षा परीक्षा (एसईई) को मौका परीक्षा साउन २३ गतेदेखि हुने भएको छ।
राष्ट्रिय परीक्षा बोर्डको आइतबार बसेको बैठकले साउन २३ देखि ३१ गतेसम्म परीक्षा सञ्चालन गर्ने निर्णय गरेको हो।
परीक्षा तालिका आज सोमबार सार्वजनिक गर्ने बोर्डले जनाएको छ ।
यसअघि बोर्डले दुई विषयमा नन ग्रेडेड (एनजी) आएका विद्यार्थीलाई साउन १८ र १९ गते मौका परीक्षा गर्ने निर्णय गरेको थियो। तर, शिक्षा मन्त्रालयले मन्त्रीस्तरीय निर्णय गर्दै एनजी आएका सबै विद्यार्थीलाई मौका परीक्षा दिन पाउने व्यवस्था गरेसँगै बोर्डले अर्को मिति तय गरेको हो। मौका परीक्षामा ५२ प्रतिशतभन्दा बढी विद्यार्थी सहभागी हुँदैछन् ।
