काठमाडौं, २० जेठ । संसद सचिवालयले आइतवारका लागि प्रधानमन्त्रीको चुनाव तोकिसकेको छ । सचिवालयको कार्यतालिकाअनुसार वर्तमान गठबन्धन सरकारको तर्फबाट र प्रमुख विपक्ष दल नेकपा एमालेको तर्फबाट प्रधानमन्त्रीको दाउपेज खेल्ने काम चिर्किदैछ ।
गठबन्धनको तर्फबाट नेपाली कांग्रेसका सभापति शेरबहादुर देउवा प्रधानमन्त्रीका लागि तयार छन् भने प्रमुख प्रतिपक्ष दल नेकपा एमालेले पनि देउवालाई प्रधानमन्त्रीमा अघि सारेमा पार्टीका उपाध्यक्ष वामदेव गौतमलाई प्रधानमन्त्रीका लागि भिडाउने देखिएको छ ।
देउवा गठबन्धनमा रहेका राजनीतिक दलहरुसहित अन्य दलहरुसँग आफू प्रधानमन्त्री बन्नका लागि लभिङ गरिरहेका छन् । उनी जतिसक्यो भोलि संसदमा हुने चुनावमा आफूमाथि वहुमत जुटाउन कसिएका छन् ।
अहिले माओवादी केन्द्रका अध्यक्षसमेत रहेका प्रधानमन्त्री पुष्पकमल दाहाल नेतृत्वको सरकारमा सहभागी दलका ३ सय ११ सांसद छन् । प्रधानमन्त्री चयनका लागि व्यवस्थापिका संसद्का सदस्यहरूको बहुमत आवश्यक पर्ने हुन्छ । संसद्मा ५ सय ९३ सांसद रहेका छन् । बहुमतीय सरकार गठनका लागि २ सय ९७ सांसद आवश्यक पर्नेमा देउवाको पक्षमा ३ सय ११ मत अहिले नै जुटिसकेको देखिन्छ । वर्तमान गठबन्धनमा कांग्रेससँग २ सय सात, माओवादी केन्द्रसँग ८२, फोरम लोकतान्त्रिकसँग १७, नेकपा संयुक्तसँग तीन, अखण्ड नेपालसँग एक र समाजवादी जनता पार्टीसँग एक सांसद रहेका छन् ।
उता नेकपा एमाले पनि स्थानीय तहको पहिलो चरणको निर्वाचनमा पहिलो पार्टी भएपछि आफूलाई भावी प्रधानमन्त्रीको दाविदार ठान्दै आएको छ । उसले कतैबाट नेकपा माओवादी केन्द्रलाई आफूतिर तान्न सकिन्छ कि भनेर दाउमै छ । त्यसैका लागि अध्यक्ष केपी शर्मा ओलीले माओवादी केन्द्रका अध्यक्ष पुष्पकमल दाहाल प्रचण्डसँग धेरै पटक लभिङ पनि गरिसकेका छन् । तर आफ्नो सरकार सहदाको सहपाठी काग्रेसलाई छोडेर माओवादी केन्द्रलाई आफ्नै सरकारको प्रतिपक्ष दल नेकपा एमालेसँग तत्काल जोडिन नैतिक संकट परेको छ ।
