काठमडौ २१ असोज । परराष्ट्रमन्त्री डा. प्रकाशशरण महत दोस्रो एसिया सहयोग संवाद (एसीडी) सम्मेलनमा भाग लिन आज थाइल्यान्ड प्रस्थान गर्दैछन् । असोज २२ देखि २४ गते बैंककमा हुने सम्मेलनमा भाग लिन परराष्ट्रमन्त्री महत त्यता जान लाग्नु भएको हो । ‘एक एसिया, विविध बल’ विषयमा हुने सो सम्मेलनमा मन्त्री डा. महतले सम्बोधन गर्ने कार्यक्रम छ ।
सम्मेलनमा एसिया सहयोग २०३० को दृष्टिकोण र विकासको साझेदारका विषयमा पनि छलफल भइ बैंकक घोषणापत्रलगायत जारी गरिनेछ । मन्त्री डा. महतसँगै परराष्ट्र सचिव शंकरदास वैरागी, थाइल्यायन्डका लागि नेपाली राजदूत खगनाथ अधिकारी र सहसचिव मणिप्रसाद भट्टराईलगायत सम्मेलनमा सहभागी हुनेछन् ।
एसियाको क्षेत्रीय सहयोग प्रवद्र्धन गर्ने उद्देश्यले सन् २००२ जुनमा एसीडी स्थापना भएको हो । नेपाल एसीडीको ३४औं सदस्य राष्ट्र हो । मन्त्री डा. महत यही असोज २५ गते स्वदेश फर्कनेछन् ।
