इन्द्रेणी संवाददाता
दाङ, बैसाख १९ । आगामी जेठ १ देखि शुभारम्भ हुन थालेको राप्तीको सर्वाधिक लोकप्रिय गायन प्रतियोगिता हिरो अफ भ्वाइस ४ को प्रोग्राम एम्बेस्डरमा स्टार समीक्षा पौडेल नियुक्त भएकी छिन् । कार्यक्रमलाई भव्यरुपमा सम्पन्न गर्न प्रचार प्रसार एवं सांगीतिक वातावरण निर्माण गर्न स्टार समीक्षालाई एम्बेस्डर चयन गरेको आयोजक संस्था उत्सर्ग फिल्मस् नेपालका प्रबन्धक निर्देशक के.एल.पीडितले बताउनु भयो ।
गतवर्ष राप्तीमा आयोजित नृत्य प्रतियोगिता उत्सर्ग डान्सिङ स्टार २०७२ को उपाधी विजेता समीक्षा राप्ती क्षेत्रको सर्वाधिक लोकप्रिय नृत्य कलाकार हुन् । दाङको घोराही ११ वुद्धनगर निवासी समिक्षा एकराज पौडेल र देवका पौडेलकी कान्छी सुपुत्री हुन् । उनी जनज्योति विद्यामन्दिरमा कक्षा ९ मा अध्ययनरत् छिन् । हिरो अफ भ्वाइस ४ को प्रोग्राम एम्बेस्डर नियुक्त भएपछि स्टार समीक्षाले आफू निकै उत्साहित भएको बताइन् । ‘म निकै उत्साहित भएको छु ।
राप्तीको सबैभन्दा प्रतिष्ठित कार्यक्रमको एम्बेस्डर बन्न पाएकोमा आफूलाई निकै भाग्यमानी संझेकी छु ।’ स्टार समीक्षाले भनिन् । विगत ४ वर्षदेखि नियमितरुपमा संचालन हुँदै आएको हिरो अफ भ्वाइस ४ को विजेतालाई रु. ५० हजार बराबरको पुरस्कारको व्यवस्था गरिएको छ ।
