दिया चन्द
काठमाडौं, १७ बैशाख ।
नेकपा माओवादी निकट अखिल (क्रन्तिकारीका) केन्द्रीय सदस्य तथा काठमाडौं जिल्ला संयोजक प्रकाश अधिकारीलाई प्रहरीले गिरफ्तार गरेको छ । स्वयम्भू प्रहरी कार्यालयले आज (शुक्रबार) दिउँसो २ बजे स्वयम्भू क्षेत्रबाट अधिकारीलाई पक्राउ गरेको अखिल क्रान्तिकारीका केन्द्रीय अध्यक्ष पूर्ण सिंहले जानाकारी दिनुभयो ।
काठमाडौंका जिल्ला शिक्षा अधिकारी शङ्कर बहादुर गौतमलाई कालोमोसो दलेको आरोपमा उनलाई पक्राउ गरिएको बताइएको छ । जिल्ला शिक्षा अधिकारी गौतमले शैक्षिक क्षेत्रमा अनियमितता गरेको , आर्थिक घोटला गरेकोले भन्दै नेत्रबिक्रम चन्द ‘विप्लव’ निकट अखिल क्रान्तिकारीले गत १५ गते कार्यकक्षमै प्रबेश गरि कालोमोसो दली जनकारवाही गरेको जनाएको थियो ।
पक्राउ परेका अधिकारिलाइ तत्काल रिहा गर्नुपर्ने माग गर्दै क्रान्तिकारीका केन्द्रीय अध्यक्ष सिंहले भन्नुभयो, ” देश र जनताको हक अधिकारको लागि लडिरहेका कार्याकर्ताहरुलाई राज्यले विभिन्न बहानामा दुस्ख दिइरहेको छ, यसको परिणाम निक्कै नराम्रो हुनसक्छ ।” पछिल्लो समय प्रहरीले नेकपा माओवादीका नेता कार्यकर्ताहरुलाई अनेकौं बहानामा गिरफ्तार गर्दै आएको छ ।।
