दाङ, भदौ १७ ।
जिल्ला वन कार्यालयको गस्ति टोलीले दाङमा सालको अवैध चिरान काठ ओसारपसारमा प्रयोग गरिएका तीन वटा मोटरसाइकल सहित सालको काठ बरामद गरेको छ । देउखुरीको राप्ति नदी पारिबाट लमही तर्फ ल्याउदै गरेको अवस्थामा तीन वटा मोटरसाइकल र १४ क्यूफिट सालको काठ बरामद गरेको सहायक वन अधिकृत हरिप्रसाद गौतमले जानकारी दिनुभयो ।
गएराती डेढ बजे राप्ति नदी पुल नजिक मोटरसाइकलमा ल्याउदै गरेको १४ थान सालको चिरान काठ बरामद गरेको हो । सहायक वन अधिकृत गौतमका अनुसार तीन वटा मोटरसाइकलपछि साइकलको ट्यूवले बाधेर ल्याउदै गरेको अवस्थामा काठ र मोटरसाइकल नियन्त्रणमा लिइएको हो ।
मोटरसाइकलमा काठ ओसारपसार गर्ने तीन जना भने गस्ति टोलीलाई देखेर मोटरसाइकल छोडी भागेकाले पक्राउ गर्न नसकिएको गौतमले बताउनुभयो । पक्राउ गरिएको काठ र काठ ओसारपसार गर्न प्रयोग गरिएको लु १९ प ४३२७, लु २१ प ४८०१ र रा २ प १६२२ मोटरसाइकल जिल्ला वन कार्यालयमा राखिएको छ । घटनाबारे थप अनुसन्धान भइरहेको जिल्ला वन कार्यालय दाङले जनाएको छ ।।
