नयाँ ऐन लागू भएसंगै विद्यालय ब्यवस्थापन समिति गठनको प्रकृया शुरु भएको छ । समितिको ढाँचामा भएको परिवर्तनलाई ध्यान दिदैं शिक्षा विभागले नयाँ विद्यालय ब्यवस्थापन समिति गठनको प्रकृया शुरु गरेको हो ।
शिक्षा ऐनको साविकको दफा १२ को उपदाफा १ संशोधन भई विद्यालय ब्यवस्थापन समितिको गठन प्रकृया सम्बन्धमा फरक ब्यवस्था गरेकोले संशोधनले गरेको ब्यवस्था बमोजिम सामुदायिक विद्यालयको ब्यवस्थापन समितिको गठन कार्य गराउन भन्दै विभागले सबै जिल्ला शिक्षा कार्यालयलाई निर्देशन दिएको छ ।
ऐन कार्यान्वयन गर्ने क्रममा विभागले ब्यवस्थापन समिति गठनको प्रकृया शुरु गरेको विभागका निर्देशक बैकुण्ठ अर्यालले बताउनुभयो ।
नयाँ शिक्षा ऐन लागू भएसंगै विद्यालयमा नयाँ ब्यवस्थापन समिति गठन गर्नुपर्ने हुन्छ । शिक्षा ऐनको दफा १२ मा संशोधन गरी सामुदायिक विद्यालयको सञ्चालन रेखदेख र व्यवस्थापन गर्नका लागि प्रत्येक विद्यालयमा गठन हुने ब्यवस्थापन समितिको ब्यवस्था गरिएको छ ।
जसमा अभिभावकहरु मध्येबाट छानी पठाएका २ जना महिला सहित ४ जना, विद्यालय रहेको गाउँपालिका वा नगरपालिकाको सम्वन्धित वडाको वडा समितिका सदस्यहरु मध्येबाट सो वडा समितिले मनोनयन गरेका सदस्य एक जना, विद्यालयका संस्थापक स्थानीय बुद्धिजिवि शिक्षा प्रेमी विद्यालयलाई निरन्तर दश बर्ष देखि सहयोग गर्ने वा विद्यालयलाई दश लाख वासो भन्दा बढी नगद वा जिन्सि सहयोग गरेका ब्यक्तिहरु मध्येबाट विद्यालय ब्यवस्थापन समितिले मनोनयन गरेको एकजना महिला सहित २ जना र विद्यालयका शिक्षकले आफूहरु मध्येबाट छानी पठाएको एकजना गरी समितिको गठन हुने ब्यवस्था छ । विद्यालयका प्रधान्ध्यापक सदस्य सचिव हुने छन् । प्रअ र शिक्षक बाहेकका उल्लेखित बर्गका सदस्यहरु मध्येबाट मात्रै अध्यक्ष छान्ने नयाँ ऐनमा ब्यवस्था गरिएको छ ।।
