इन्देणी संवाददाता
जाजरकोट, साउन ४
जाजरकोटका १० गाविस पूर्ण खोपयुक्त घोषित भएका छन् । १० गाविसमा दुई वर्षदेखि नियमित रुपमा सबै बालबालिकालाई खोप लगाउने गरिएका कारण पूर्ण खोपयुक्त गाविस घोषणा गरिएको हो ।
दुई वर्षसम्मका बालबालिकामा सर्वेक्षण गर्दा सबै बालबालिकाले १० वटै खोप नछुटाइ लगाएको पाइएपछि जिल्ला खोप समन्वय समितिको सिफारिस गाविसलाई पूर्ण खोपयुक्त गाविस घोषणा प्रावधान रहेको छ । त्यही अनुसार सवै मापदण्ड पुरा भएपछि १० गाविसलाई पुर्णखोपयुक्त गाविस घोषणा गरिएको जिल्ला स्वास्थ्य प्रमुख राजेन्द्र जिसीले बताउनुभयो ।
जिल्लाका पैक, जगतीपुर, साल्मा, दशेरा, अर्छानी, लहँ, ढिमे, झाप्रा, टालेगाउ, सुवानाउली गाविसका २७ सय १२ बालबालिकाले १० वटै खोप लगाएका छन् । अरु गाविसलाई पनि क्रमशः पूर्ण खोपयुक्त गाविस घोषणा गरिने प्रमुख जिसीले बताउनुभयो । रग्दा, भगवती, कार्कीगाउ, डाडागाउ, सक्ला, रामीडाँडा, भुरसहितका गाविसलाई चाँडै नै पूर्ण खोपयुक्त घोषणा गरिने उहाँले बताउनुभयो ।।
