इन्द्रेणी संवाददाता
दाङ, १४ कार्तिक । लुम्बिनी प्रदेशको आउदो हिउँदे अधिवेशन दाङमा गर्ने तयारी थालिएको छ । त्यसका लागि प्रदेश सरकारले लुम्बिनी प्रदेशको स्थायी राजधानी घोषणा गरेको देउखुरीको राप्ती उपत्यकामै क्षेत्रमै तयारी गरिएको छ ।

mmहिउँदे अधिवेशको लागि प्रदेशका सभामुख, उपसभामुख र कानुन मन्त्री सहितको टोलीले लालमटियाँमा रहेको राप्ती प्राविधिक शिक्षालयको स्थलगत अवलोकन गरेको छ । टोलीले शिक्षालयभित्रको भौतिक पूर्वाधार अधिवेशनका लागि प्रयोग गर्न सकिने नसकिनेबारेमा अवलोकन गरेको हो ।

सभामुख पूर्णबहादुर घर्ती, उपसभामुख कृष्णी थारु, आन्तरिक तथा कानुनमन्त्री कुलबहादुर केसीलगायतको टोलीले त्यहाँको अवस्थाबारे स्थलगत अवलोकन गर्नुका साथै त्यहाँका स्थानीय जनप्रतिनिधिसँग छलफल समेत गरेको थियो ।

प्रदेशको स्थायी राजधानीको कार्यान्वयनसहित छलफल गरेर अघिवेशन बोलाउन सकिने सभामुख पूर्णबहादुर घर्तीले बताए । प्रदेश सरकारले तिहार लगतै मंसिरमा हिउँदे अघिवेशन बोलाउने तयारी गरेको छ । तर अधिवेशनको टुंगो भने लगाइ सकेको छैन ।