काठमाडौं– नयाँ शक्ति नेपालको पार्टी घोषणा सभालाई आइतबार राजधानीको दशरथ रंगशालामा सम्बोधन गर्दै प्रधानमन्त्री केपी शर्मा ओलीले नयाँ शक्ति नेपालमा एमाले बाहेक सबै पार्टीलाई धक्का दिन सक्ने क्षमता भएको बताएका छन् ।
उनले भने बन्दै गरेको पार्टीले के गर्छ अहिले नै भन्न सकिँदैन तर नयाँ शक्तिले एमाले बाहेक अरु सबै पार्टीलाई धक्का दिन सक्छ ।
नयाँ शक्तिले नेपाली समाजमा राष्ट्रिय एकता, स्वाभिमान , आर्थिक उन्नती तथा प्रगतिमा सकारात्मक भूमिका खेल्ने विस्वास समेत उनले व्यक्त गरे ।
प्रधानमन्त्री ओलीले लोकतान्त्रिक प्रक्रियाबाट संविधान ल्याइएको अधिकारको संस्थागत गरिसकिएको भन्दै संविधानअनुसार सबै राजनीतिक दलकहरु अघि बढ्नुपर्नेमा जोड दिए ।
उनले संविधानमा भएको व्यवस्थाअनुसार त्यसका संरचनाहरुको पूर्णता दिनु नै अहिलेको आवश्यकता हो भन्दै प्रधानमन्त्रीले भने, ‘संरचनाहरुको पूर्णतापछि विकासमा लाग्नुपर्छ । नेपाल जस्तो देश गरीब हुन सक्दैन ।’ देशमा धेरै पार्टी भएको तर आर्थिक समृद्धि गर्न सक्ने खालको पार्टी चाहिएको पनि सो अवसरमा बताए ।
उनले संविधानले सबैप्रति समान व्यवहार गरेको भन्दै यति हुँदाहुँदै पनि केहि अुन्तुष्टि भए वार्तामार्फत समस्याको समाधान गर्न सरकार प्रतिबद्ध रहेको बताए ।
उनले आन्दोलनरत पक्षलाई वार्तामा आउन समेत आग्रह गरे ।
