बाढीपहिरोबाट सत्रको मृत्यु, आठ बेपत्ता

काठमाडौँ, २८ असार । लगातारको वर्षाका कारण मुलुकभरको जनजीवन प्रभावित भएको छ । बिहीबार रातिबाट सुरु भएको लगातारको वर्षाका कारण बाढीले बगाएर तथा पहिरोमा पुरिएर १७ जनाको ज्यान गएको छ ।

राजधानीको मूलपानीमा घरटहरामाथि पहिरो खस्दा एकै परिवारका तीनको मृत्यु भएको छ । बारा जिल्ला घर भई हाल मूलपानीमा बस्दै आउनुभएका नितु यादव, शर्मिला यादव र बालक कुन्दन यादवको मृत्यु भएको छ ।

त्यस्तै बल्खु खोलाले बगाई ल्याएको ग्यास सिलिन्डर समात्न जाँदा एक व्यक्ति बेपत्ता भएका छन् । बगेर बेपत्ता भएका ती व्यक्तिको पहिचान हुन नसकेको जानकारी प्रहरीले दिएको छ । खोटाङ जिल्लाको खोटाहाङ गाउँपालिका–२ स्थित पहिरोमा परी एउटै परिवारका तीनको मृत्यु भएको छ ।