पाल्पा, भाद्र १२
नेपाल मगर संघ केन्द्रिय समितिको तेस्रो पूर्ण बैठक पाल्पाको तानसेनमा सम्पन्न भएको छ । शुक्रबार र शनिबार गरी दुई दिन सम्म चलेको बैठकमा केन्द्रिय सदस्य एबं पदाधिकारीहरुले आफ्ना जिल्ला एबं क्षेत्रका बारेमा रिपोर्टिङ्ग गरेका थिए । बैठकमा ११ औं महाधिबेशन बाट निर्वा्चित पदाधिकारी, केन्द्रिय सदस्यहरुलाई निर्वतमान अध्यक्ष महेन्द्र थापाले प्रमाण पत्र वितरण गर्नु भएको थियो ।magarसंघका केन्द्रिय अध्यक्ष नविन रोकाको अध्यक्षतामा भएको बैठकले चितवनका जीवन थापा मगर र जोया बिचको घटनाको सम्वन्धमा छानविन गर्न संघका विदेश सचिव रक्षा रईकाको संयोजकत्वमा समिति गठन गरेको छ ।

समितिमा केन्द्रिय कोषाध्यक्ष कमला थापा, केन्द्रिय सदस्य चन्द्र बहादुर राना, नेपाल मगर संघ चितवन जिल्ला अध्यक्ष सुरवीर थापा, अधिवक्ता सन्तोष राना, इन्दिरा श्रीस र पत्रकार महेश राना गरी ७ सदस्सिय समिति गठन भएको छ । बैठकले समितिलाई १५ दिन भित्र प्रतिवेदन तयार गर्न समय दिएको छ । छानविनको आधारमा कारवाही अगाडि बढाउने निर्णय भएको महासचिब ज्ञानेन्द्र पुनले जानकारी दिनुभयो ।

बैठकमा अध्यक्ष नविन रोकाले संगठन भित्र राजनिति मान्य नहुने भन्दै पहिचान र अधिकार प्राप्तीका लागी ईमान्दार भएर अघि बढ्न आग्रह गर्नुभएको छ । समितिको बैठकमा बरिष्ठ उपाध्यक्ष गुरु प्रसाद घर्तिले संघको आचार संहिता र महिला उपाध्यक्ष गंगा खासुले केन्द्रिय समितिको विगतमा भएका र भविष्यमा हुने ४ वर्षे कार्यक्रम बारे जानकारी गराउनु भएको थियो । मगर गाउँ जाउँ, सबै मगरलाई विउझाउ भन्ने नारा सहित बैठक सम्पन्न भएको हो ।।