काठमाडौं, ३ असोज । आज सातौं संविधान दिवस । जनताद्धारा स्थापना भएको लोकतान्त्रिक गणतन्त्रबाट निर्माण भएको नेपालको संविधान आज ६ वर्ष पुरा गरेर सातौ वर्षमा प्रवेश गरेको छ ।
यो दिनस सरकारले तीन दिनसम्म विविध कार्यक्रमको आयोजना गरी मनाउने घोषणा समेत गरिसकेको छ । आजको दिन सबैले घरघरमा दिप बालेर संविधान दिवस बनाउन समेत सबै नेपाली जनतालाई आग्रह गरिएको छ । टुँडिखेलमा विशेष समारोह गरी दिवस मनाउने तयारी छ । आजकै दिन अर्थात २०७२ असोज ३ गतेका दिन संविधान जारी गरिएको थियो ।
संविधान दिवसमा ९०३ जनालाई विभूषण
संविधान दिवसका अवसरमा राष्ट्रपति विद्यादेवी भण्डारीले ९०३ जनालाई विभिन्न विभूषण, अलङ्का र पदक प्रदान गरेकी छन् । नेपालको संविधानको धारा २७७ को उपधारा (१) बमोजिम गत भदौ २९ गतेको मन्त्रिपरिषद्का सिफारिसमा उनले ती विभूषण प्रदान गरेकी हुन् ।
नेपाल रत्न एक जनालाई, राष्ट्र गौरव दुई जनालाई, महाउज्ज्ल राष्ट्रदीप प्रथम श्रेणी पाँच जनालाई, सुप्रसिद्ध प्रवल जनसेवाश्री प्रथम श्रेणी पाँच जनालाई, उज्ज्वल कीर्तिमय राष्ट्रदीप द्वितीय श्रेणी एक जनालाई, प्रसिद्ध प्रवल जनसेवाश्री द्वितीय श्रेणी २४ जनालाई, सुकीर्तिमय राष्ट्रदीप तृतीय श्रेणी ३९ जनालाई, सुप्रवल जनसेवाश्री तृतीय श्रेणी १६१ जनालाई, कीर्तिमय राष्ट्रदीप चतुर्थ श्रेणी आठ जनालाई, प्रवल जनसेवाश्री चतुर्थ श्रेणी ३१९ जनालाई र जनसेवाश्री पञ्चम श्रेणी १९० जनालाई प्रदानगरेको राष्ट्रपतिको कार्यालयले आज जनाएको छ ।
