दाङ, १३ जेठ । गएको वैशाख १८ गते दाङको तुलसीपुरमा एउटै कारभित्र मृत भेटिएका तीन बालकको निसास्सिएर ज्यान गएको भिसेरा रिपोर्टले देखाएको छ ।
तुलसीपुर उपमहानगरपालिका ६ बरुवा गाउँका भीमबहादुर परियारका छोरा नौ वर्षका सन्दीप, सन्तोष परियारका छोरा सात वर्षका सुवास र किरण परियारका छोरा ६ वर्षका करण स्याउली बजारमा पार्किङ गरिराखेको भारतीय नम्बर प्लेटको कारभित्र मृत भेटिएका थिए ।
ती बालकहरूको निसास्सिएर ज्यान गएको तथ्य भिसेरा रिपोर्टले देखाएको इलाका प्रहरी कार्यालय तुलसीपुरका प्रमुख एवम् प्रहरी नायब उपरीक्षक (डीएसपी) शिबबहादुर सिंहले बताए । यसअघिको पोष्र्टमाटम रिपोर्टमा पनि ती बालकहरुको शरीरमा कुनै चोटपटक नभए देखाएको थियो ।
