इन्द्रेणी संवाददाता
घोराही । सडक मानवहरुको लागि सहयोगार्थ मानव कल्याण समाज दाङ शाखाको आयोजनामा घोराहीमा ‘श्रीमद्भागवत सप्ताह ज्ञान महायज्ञ २०८१’ मा सुरु भएको छ ।
महायज्ञको उद्घाटन गर्दै लुम्बिनी प्रदेश प्रमुख घर्ती मगरले पहिला मानव बचाउन तर्फ लाग्न आग्रह गरे । ‘सडक बनाउने काम गर्दै गरौला पहिले मानव बनाऔँ, जुन काम सरकारले अपनत्व लिएर गर्नुपर्छ’ उनले भने, ‘आँफू सरकारमा भएको बेलामा हो काम गर्ने, मानव बनाउने काम गर्नु तपाईहरुका लागि पनि अवसर हो । अवसरको रुपमा लिएर काम गर्नुस् ।’
उनले मानव कल्याण समाजले बेवारिसे एवं मानसिक समस्या भएका मानिसहरुलाई सेवा घरमा राखेर सेवा दिएकोमा धन्यवाद ज्ञापन गरे । सेवा घर नारायणपुरका अवलोकन गरेको बताउदै प्रमुख घर्तीले सरकारले गर्नुपर्ने काम एक सामाजिक संस्थाले गरिरहेकोमा यस अभियानलाई सरकारले पनि साथ र सहयोग गर्नुपर्ने बताए । तीन तहकै सरकारले यो विषयलाई गम्भीर रुपमा लिएर अगाडि बढ्न अनुरोध गर्दै उनले स्थानीय सरकार आफैमा स्वायत्त भएकाले पनि सामाजिक विषयलाई ध्यान दिएर काम गर्न आवश्यक रहेको बताए ।
त्यस्तै घोराही उपमहानगरपालिकाका प्रमुख नरुलाल चौधरीले सडक मानव मुक्त समाज बनाउनकाल लागि घोराही उपमहानगरपालिकाले मानव कल्याण समाजसँग सहकार्य गरेर काम गरिरहेको बताए । उपमहानगरपालिकाले हरेक बर्ष बजेट बिनियोजन गरेर सेवा घरलाई सहयोग गरेको र सेवा घरलाई अप्ठेरो परिस्थिति आउन नदिने प्रतिवद्धता व्यक्त गरे । साथै उपमहानगरपालिकाले यहाँका सडक बालबाललिका, सडकमा झाडा पशुचौपाया व्यवस्थापनमा पनि उपमहानगरपालिकाले काम गरेको बताए ।
महायज्ञ आयोजक मूल समितिका संयोजक चन्द्रराज पन्तको अध्यक्षतामा भएको कार्यक्रममा जिल्ला समन्वय समिति दाङका प्रमुख नित्यानन्द शर्मा, नेपाली कांग्रेसका लुम्बिनी प्रदेश सहमहामन्त्री खगराज पाण्डे, एमालेका केन्द्रीय सदस्य जिवन गौतम, माओवादी केन्द्र दाङका अध्यक्ष निर्मल आचार्य, नेपाल पत्रकार महासंघका निवर्तमान केन्द्रीय अध्यक्ष विपुल पोख्रेल, महासंघका केन्द्रीय सचिव सविन प्रियासन, प्रेस स्वतन्त्रता सेनानी सुशील गौतमलगायतले आफ्ना विचार व्यक्त गरेका थिए ।
महायज्ञ सहसंयोजक नारायण भुषालको स्वागत मन्तव्यबाट सुरु भएको कार्यक्रममा अर्को सहसंयोजक बिमला योगीले धन्यवाद ज्ञापन गरेकी थिइन् भने कार्यक्रमको सहजिकरण आर.के.शीतल र बिजय पोख्रेलले गरेका थिए ।