दाङ। मानव कल्याण समाज दाङ (सेवा घर) को आयोजनामा घोराहीमा श्रीमद्भागवत सप्ताह ज्ञान–विज्ञान महायज्ञ सञ्चालन हुने भएको छ । घोराहीस्थित कर्मचारी मिलन केन्द्रमा यही माघ १७ गतेदेखि २४ गतेसम्म महायज्ञ सञ्चालन हुने छ । समाजले आइतबार घोराहीमा पत्रकार सम्मेलन गरी महायज्ञको बारेमा जानकारी गराएको छ।
घोराही–१० नारायणपुरमा रहेको सेवा घरमा हाल ५२ जना व्यक्तिहरुले सेवा पाइरहेको अध्यक्ष सुमि जानकारी दिइन्। जसमा चार महिनाको बालिकादेखि लिएर ९० वर्षसम्मका बृद्धहरु रहेका छन् । सेवा घरमा चार जना बालिका र तीन जना बालक गरी सात जना रहेका छन् भने २१ जना पुरुष र २४ जना महिलाहरु रहेका छन् ।
सेवा घरमा रहका ५२ जनाको परिवारमा ४५ जनाले नियमित रुपमा मानसिक रोगको औषधि सेवन गरिरहेको समेत उनले बताइन् । महायज्ञबाट संकलित रकम सेवा घरमा रहेका व्यक्तिहरुकै लागि खाना, नाना र छानामा मात्र प्रयोग गरिने अध्यक्ष सुमिको भनाइ छ । महायज्ञका लागि मूल समिति तथा विभिन्न उपसमितिहरु पनि गठन गरिएको छ ।
यस श्रीमद्भागवत ज्ञान–विज्ञान महायज्ञमा आर्थिक सहयोगसँगै आफ्नो जन्मोत्सव, बिवाह उत्सव, ब्रतबन्ध, चौरासी, गुन्युचोली, पितृहरुको सम्झना वा यस्तै बिशेष पलहरुमा सेवा घरमा एक छाक भोजन वा कुनै विषयगत सेवा गरेर मानव कल्याण समाजलाई सहयोग गर्न सकिने छ ।