विद्युत महशुल नबुझाएपछि तुलसीपुर उपमहानगरको विद्युत लाइन काटियो

दाङ, १४ बैशाख । दाङको तुलसीपुर उपमहानगरपालिकाले कार्यालयले तिर्नुपर्ने विद्युत महसुल नतिर्दा कार्यालयको विद्युत लाइन काटिएको छ । कार्यालयले हालसम्मको ९० लाखभन्दा बढी विद्युत वक्यौता नतिरेपछि विद्युत लाइन काटिएको नेपाल विद्युत प्राधिकरण वितरण केन्द्र तुलसीपुरले बताएको छ ।

पटक–पटक विद्युत वक्यौता तिर्नका लागि ताकेता गरिएको र एकसाता पहिले वक्यौता बुझाउनका लागि पत्राचार समेत गरिएको थियो । पटक पटकको ताकेता र पत्राचारलाई वेवास्ता गरेपछि विद्युत लाइन काट्न वाध्य भएको विद्युत प्राधिकरण वितरण शाखा तुलसीपुरका प्रमुख ज्ञानबहादुर फर्सालले बताए । ‘हामीले पटक–पटक विद्युत महसुल बुझाउन पत्रमार्फत ताकेता गर्दै आएका थियौँ’ उनले भने–‘उपमहानगरले कुनै पनि प्रतिक्रिया नदिएपछि बाध्य भएर विद्युतलाइन काट्नु परेको हो ।’ अहिले तुलसीपुर उपमहानगरपालिकाको चार महिनाको १ लाख ६० हजार विद्युत वक्यौता बुझाउँन बाँकी छ । जरिमानासहित चार महिनाको १ लाख ६० हजार महशुल बुझाउँन बाँकी रहेको प्रमुख फर्सालले बताए ।

त्यस्तै उज्यालो तुलसीपुर बनाउने उद्देश्यले तुलसीपुरमा जोडिएको सडक बत्तीको समेत उपमहानगरपालिकाले लामो समयदेखि महशुल बुझाएको छैन । सडक बत्तीको मात्रै जरिमानासहित ९० लाखभन्दा बढी बक्यौता रहेको नेपाल विद्युत प्राधिकरण वितरण केन्द्र तुलसीपुरले बताएको छ । उपमहानगरपालिकाले गत साउन महिनामा सडक बत्तीको ३० लाख महसुल बुझाए पनि अझै ९० लाख वक्यौता बुझाउन बाँकी रहेको छ ।

यता उपमहानगरपालिकाले भने कार्यालयले नियमित रूपमा विद्युत महसुल तिर्दै आएको बताएको छ । जनप्रतिनिधि नभएको मौका पारेर कर्मचारीलाई सास्ती दिने उद्देश्यले नियतवश विद्युतलाइन काटिएको उपमहानगरपालिकाका प्रमुख प्रशासकीय अधिकृत मोहन पौडेलले बताए । एकपटक पनि नसोधेर जानकारी विना नै विद्युत लाइन काटिनु नियतवश देखिएको उनले भनाइ छ ।
विद्युत प्राधिकरणले उपमहानगरपालिकाको विद्युतलाइन काटेपछि कार्यालयको काम जेनेरेटरबाट गरिदै आएको छ ।