तुलसीपुरमा दुई सहकारी मर्ज

तुलसीपुर, २ पुस । दाङ विस्तारै सहकारी संस्थाहरु मर्ज हुदैछन् । यसैक्रममा तुलसीपुरका दुई सहकारी मर्ज भएछन् । हाम्रो पहुँच बहुउद्देश्यीय सहकारी संस्था लिमिटेड र सप्तरंगी बहुमुखी सहकारी संस्था लिमिटेडबीच एकीकरण भएको हो ।

तुलसीपुर–७ मा रहेको हाम्रो पहुँच र तुलसीपुर–१७ मा रहेको सप्तरंगी सहकारी शुक्रबार औपचारिकरुपमा एकीकरण भएका हुन् । तुलसीपुर उपमहानगरपालिकाको सहकारी ऐन २०७४ को दफा ६ को उपदफा १ बमोजिम दुई सहकारीबीच एकीकरण भएको प्रमाणपत्र आज नगर प्रमुख घनश्याम पाण्डेले हस्तान्तरण गरे । नगर प्रमुख पाण्डेले संघ, प्रदेश र स्थानीय सरकारको सहकारी मर्जको नीति अनुरुप नै तुलसीपुर उपमहानगरपालिकामा पहिलो पटक हाम्रो पहुँच र सप्तरंगी एकीकरण भएको बताए ।

एकीकरणपछि पनि सहकारीको नाम हाम्रो पहुँच बहुउद्देश्यीय सहकारी संस्था लिमिटेड रहेको अध्यक्ष शुक्रराज भण्डारीले जानकारी दिए । दुई सहकारी मर्जलाई अन्तिम रुप दिन दुवै सहकारीको प्रक्रिया गत वर्षदेखि नै शुरु भएपनि तुलसीपुर उपमहानगरपालिकामा एकीकरण सम्बन्धी कानुन निर्माणमा ढिलाइ भएका कारण केही ढिला गरी एकीकरण भएको उनले बताए ।

मर्जपछि सहकारीको एकीकरणवासलात १५ करोड पुगेको छ ।