दाङ, ३ भदौ । दाङको घोराहीदेखि मुर्कुटीसम्मको सडक सुधारका लागि सडक क्षेत्रका २५ बढी टोल विकास संस्थाले थालेको आन्दोलनमा विभिन्न क्षेत्रका अगुवाहरुले एक्येबद्धता जनाएका छन् । घोराही नवलपुरमा आयोजित कार्यक्रममा उनीहरुले एक्येबद्धता जनाएको हुन् ।
सहभागीहरुले आन्दोलन सही भएकाले कुनै आंशिक सहमतिमा आन्दोलन नतुहाउन आग्रह गरेका थिए । बिगतमा आन्दोलन भए पनि सामान्य सम्झौतामा टुंगिने गरेको भन्दै उनीहरुले यसपटक वैकल्पिक सडक सञ्चालन नहुँदासम्म आन्दोलन जारी रहनुपर्ने बताए ।
कार्यक्रममा घोराही १५ का अध्यक्ष रमेश पाण्डेय, घोराही ४ का अध्यक्ष भीमबहादुर सार्की, घोराही ३ का अध्यक्ष माधव चौधरी, नागरिक समाजका कार्यवाहक अध्यक्ष हरिप्रसाद पाण्डे, नेपाल पत्रकार महासंघ दाङका उपाध्यक्ष सन्तोष सुवेदी, दाङ उद्योग वाणिज्य संघका कोषाध्यक्ष सुशील पोख्रेल, सरोकार समितिका सहसंयोजक टेकबहादुर घर्तीलगायतले आफ्ना धारणा राखेका थिए ।
आन्दोलनका कार्यक्रमअन्तर्गत वैकल्पिक सडक सञ्चालनमा नआउँदासम्म आन्दोलन जारी रहने, वैकल्पिक सडक सञ्चालन नहुँदासम्म साँझ ७ बजेदेखि विहान ६ बजेसम्म मात्रै सिमेन्ट उद्योगसम्बद्ध टिप्पर चल्न दिइनेछ र उद्योगदेखि खानीस्थलसम्मको सडक किनारामा कतै पनि टिप्पर पार्किङ गर्न नदिने जानकारी गराइएको थियो । कार्यक्रम सहजीकरण सरोकार समिति सदस्य पुरन शर्माले गरेका थिए ।
घोराही–मुर्कुटी सडक सुधार सरोकार समितिले यसअघि जिल्ला प्रशासन कार्यालय, जिल्ला प्रहरी कार्यालय, घोराही उपमानगरपालिका, बंगलाचुली गाउँपालिका, सडक डिभिजन कार्यालय र जिल्ला ट्राफिक कार्यालयमा ज्ञापनपत्र बुझाइसकेको छ । बंगलाचुली गाउँपालिका वडा नम्बर ४ ले दिनको समयमा टिप्पर चलाउन लगाएको रोकप्रति समर्थन गर्दै समितिले दैनिक टिप्पर सञ्चालनको अनुगमन पनि गरिरहेको संयोजक पोख्रेलले जानकारी दिए ।