इन्द्रेणी संवाददाता
दाङ, १८ असार । दाङ प्रहरीले चोरीका १३ वटा मोटरसाइकलसहित आठ जना पक्राउ गरेको छ । विभिन्न समयमा दाङका विभिन्न स्थानबाट मोटरसाइकल चोरी गरी रोल्पा र प्यूठानमा विक्री गर्दै आएका आठ जनालाई विशेष सूचनाका आधारमा पक्राउ गरिएको जिल्ला प्रहरी कार्यालय दाङले जनाएको छ ।
चोरीमा संलग्न उनीहरुलाई मोटरसाइकलसहित शुक्रवार पत्रकार सम्मेलन गरी सार्वजनिक समेत गरेको छ । उनीहरुले मोटरसाइकल चोरी गर्ने र त्यसको नम्बर र स्वरुप परिवर्तन गरी पहाडी जिल्ला रोल्पा, प्यूठानमा विक्री गर्ने गरेको प्रहरीको अनुसन्धानबाट खुलेको छ ।
दाङका विभिन्न स्थानबाट मोटरसाइकल चोरी गरी रोल्पा र प्यूठानमा विक्री भइरहेको सूचनाका आधारमा दाङ प्रहरीको टोली ती जिल्लाका विभिन्न स्थानमा खटिएर ती व्यक्ति र मोटरसाइकल नियन्त्रणमा लिएको हो । उनीहरुबाट नागरिकता, केही मोटरसाइकलका व्लुवुक, मोवाइल समेत प्रहरीले बरामद गरेको छ ।
चोरी गरिएका मोटरसाइकलका नम्बर परिवर्तन भइसकेकाले ती मोटरसाइकलको वास्तविक नम्बर पहिचान नभइसकेकाले चोसिस नम्बर र इन्जिन नम्बरको आधारमा आफ्नो मोटरसाइकल पहिचान गरी प्रहरीका सम्पर्क गर्न मोटरसाइकल धनीलाई प्रहरीले अनुरोध समेत गरेको छ ।
पछिल्लो समयमा जिल्लाका मोटरसाइकल चोरीको घटना बढ्दै गएकाले यसलाई नियन्त्रण गर्न प्रहरीको सक्रियता बढाइएको जिल्ला प्रहरी कार्यालय दाङका प्रमुख एसपी सुरेश प्रसाद काफ्लेले बताए ।