पूर्वसभामुख महराले गरे १०० बोरा चामल सहयोग

इन्द्रेणी संवाददाता
दाङ, ५ बैशाख । पूर्वसभामुख कृष्णबहादुर महराले लकडाउनका कारण कोही भोकै सुत्न नपरोस् भन्ने उद्देश्यका साथ १०० वोरा चामल सहयोग गरेका छन् । दिनभरी काम गरेर साँझ छाक टार्नेलाई सरकारले गरेको लकडाउनका कारण छाक टार्न अफ्टेरो परिरहेको वेला महराले जिल्ला प्रशासन कार्यालयको विपद् व्यवस्थापन कोषमा १०० वोरा चामल सहयोग गरेका हुन् ।

महराका स्वकीय सचिव प्रमोद शर्माले आज प्रमुख जिल्ला अधिकारी गोविन्दप्रसाद रिजाललाई उक्त सहयोग चामल हस्तान्तरण गरेका हुन् । यो आफ्नो पहिलो चरणको सहयोग भएको र अब दोस्रो चरणमा औषधि र व्यक्तिगत सुरक्षा सामग्री उपलव्ध गराउने तयारी रहेको बताइएको छ । पूर्वसभामुख महरा दाङ क्षेत्र नं. ३ ‘क’ बाट निर्वाचत सांसद पनि हुन् ।

विश्वव्यापी रुपमा महामारीको रुपमा फैलिदै गएको कोभिड १९ को जोखिमबाट बचाउनका लागि नेपाल सरकारले गएको चैत १० गतेदेखि लगातार लकडाउनको आह्वान गर्दै आएको छ । लकडाउन थपिदै जाँदा न्यून आर्थिक अवस्था भएका र दैनिक मजदूरी गरेर खानेहरुलाई समस्या पर्दै आएको छ ।