जागिर लगाइदिने भन्दै ठगी गर्ने व्यक्ति प्रहरी नियन्त्रणमा

इन्द्रेणी संवाददाता
दाङ, ५ भदौ । दाङ प्रहरीले विभिन्न व्यक्तिहरुलाई जागिरी लगाइदिने भन्दै लाखौको ठगी गरी फरार भएका एक जनालाई पक्राउ गरेको छ । पक्राउ गर्नेमा तुलसीपुर १७ का २३ वर्षिय विकाशराज गुरु रहेका छन् ।

उनले घोराही सेवार वस्ने रीता चौधरीलगायत ६ जनलाई एग्रीकल्चर नेपाल संस्थामा जागिर लगाइदिने भन्दै १ लाख १७ हजार १ सय ठगी गरेको प्रहरीले जनाएको छ । पीडितको जाहेरीमा गुरुलाई पक्राउ गरिएको हो । उनले ती व्यक्तिहरुलाई सो संस्थामा जागिर दिनेभन्दै विभिन्न पदमा नियक्ति समेत गरेको खुलेको प्रहरीले जनाएको छ ।

पीडितले साउन १२ गते जाहेरी दिएको र प्रहरीले खोजी गर्दै जाँदा भदौ ३ गते राप्ती स्वास्थ्य विज्ञान प्रतिष्ठानको गेट अगाडिबाट पक्राउ गरेको जिल्ला प्रहरी कार्यालय दाङले जनाएको छ । उनीमाथि अनुसन्धान भइरहेको छ ।