Indrenionline.com

नेपाली पत्रकारितामा सहिद कृष्णसेनको चर्चा

इन्द्रेणी संवाददाता
दाङ, १३ जेठ । नेपाली पत्रकारिता जगतमा सहिद कृष्ण सेन इच्छुकको योगदान महत्वपूर्ण भएको वक्ताहरुले बताएका छन् । सेनको १७ स्मृतिको अवसरमा आज दाङको घोराहीमा आयोजना गरिएको कार्यक्रममा बोल्ने वक्ताहरुले सेन सत्यको पक्ष र अन्यायको विपक्षमा बोल्ने र लेख्ने एउटा निडर पत्रकार भएको उल्लेख गर्दै उनको त्यो सिद्धान्तलाई सबैले शिरोधार्य गर्नुपर्नेमा जोड दिए ।

नेपाल पत्रकार महासंघ दाङशाखा, प्रेस संगठन दाङ र जनसांस्कृतिक महासंघ दाङले आयोजना गरेको कार्यक्रममा तीन जनालाई सम्मान तथा पुरस्कृत गरिएको थियो ।

प्रेस सेन्टर दाङमा स्थापना गरिएको सहिद कृष्ण सेन इच्छुक स्मृति पत्रकारिता पुरस्कारबाट वरिष्ठ पत्रकार प्रेस काउन्सिल नेपालका पूर्व अध्यक्ष नारायणप्रसाद शर्मालाई सम्मान गरिएको छ भने नेपाल पत्रकार महासंघ दाङशाखामा स्थापना गरिएको सेन स्मृति पत्रकारिता पुरस्कारबाट महासंघका पूर्वअध्यक्ष केएल पीडितलाई सम्मान गरिएको छ । त्यस्तै जनसंस्कृतिक महासंघमा स्थापना गरिएको सहिद कृष्ण सेन इच्छुक स्मृति साहित्य पुरस्कारबाट साहित्यकार निर्मल आचार्य (सौगात) लाई सम्मान गरिएको छ ।

कार्यक्रममा प्रमुख अतिथि प्राज्ञ डा. अमर गिरीले सम्मानित सबैलाई सम्मानपत्र र पुरस्कार वितरण गरेका थिए । कार्यक्रममा नेपाल पत्रकार महासंघका केन्द्रीय सचिव उदय जिएम, नेकपाका अध्यक्ष टिकाराम खड्का, सचिव सुवास पुन, पत्रकार महासंघका पूर्वकेन्द्रीय सदस्य अजयदिप शर्मा, शाखा पूर्वअध्यक्ष प्रताव रेग्मीलगायतले आफ्ना विचार राखेका थिए ।

प्रेस सेन्टर दाडका कार्यवहाक अध्यक्ष प्रकाश चौधरीको अध्यक्षतामा भएको कार्यक्रममा प्रेस चौतारी दाङका अध्यक्ष जेएन सागरले स्वागत गरेका थिए भने सम्मानितहरुको व्यक्तित्व परिचय नरेन्द्र केसीले गराएका थिए । कार्यक्रमको सहजीकरण नेपाल पत्रकार महासंघ दाङका सचिव भुपेन्द्र वलीले गरेका थिए ।