इन्द्रेणी संवाददाता
दाङ, १७ फागुन । प्रेस काउन्सिल नेपालका कार्यवहाक अध्यक्ष किशोर श्रेष्ठले पछिल्लो समयमा नेपाली पत्रकारितामा उच्छृंखलता बढ्दै गएको बताए । प्रेस काउन्सिल नेपालको आयोजनामा आज दाङको घोराहीमा सम्पन्न साहित्यिक पत्रकारिता गोष्ठी तथा आचारसंहिता संवाद कार्यक्रममा बोल्दै उनले नेपाली पत्रकारितामा देखिएको उच्छृंखलता र अराजगकताप्रति चिन्ता व्यक्त गर्दै पत्रकारहरुलाई पत्रकारिताको आचारसंहिताभित्र रहेर काम गर्न आग्रह गरे ।
कार्यक्रममा प्रमुख अतिथि प्रेस काउन्सिल नेपालका पूर्वअध्यक्ष एवं वरिष्ठ पत्रकार नारायणप्रसाद शर्माले अझै पनि समाजिमा साहित्यिक पत्रकारितालाई पत्रकारिताको रुपमा स्वीकार्ने वातावरण सृजना नभएको उल्लेख गर्दै नेपाललाई यहाँसम्म ल्याउनका लागि साहित्यिक पत्रकारिताको पनि महत्वपूर्ण भूमिका रहेको बताए ।
नेपाल पत्रकार महासंघका केन्द्रीय अध्यक्ष गोविन्द आचार्यले मुलुक संघीयतामा गए पनि नेपाली पत्रकारहरुले संघीय संरचनाको अनुभू ितगर्न नपाएको बताए । ‘मुलुक संघीयतामा भएको छ, सिंगदरवार गाउँगाउँमा गएको भनिएको छ तर हामी पत्रकारहरुले यसको अनुभूति समेत गर्न पाएका छैनौं, सञ्चार क्षेत्रमा संघीयता आएको छैन’, उनले भने ।
कार्यक्रममा घोराही उपमहानगरपालिकाका मेयर नरुलाल चौधरी, नेपाल साहित्यिक पत्रकार संघका केन्द्रीय अध्यक्ष नगेन्द्रराज शर्मा, वरिष्ठ सौन्दर्यशास्त्री निनु चापागाइ, रोचक घिमिरे, गंगा सुवेदीलगायतले आ–आफ्ना विचार व्यक्त गरेका थिए । सो अवसरमा विषयवस्तुको प्रवेश प्रेस काउन्सिल नेपालका सदस्य इश्वरी ओझाले गराएका थिए ।