बर्मा मृत्युको सत्य तथ्य छानविन गर्न महासंघको माग

दाङ १० भदौ। नेपाल पत्रकार महासंघ दाङले साधारण सदस्य पार्वति बस्नेतका श्रीमान प्रमोद बर्माको मृत्यु रहस्यमय ढंगले भएको भन्दै तत्काल सत्यतथ्यरुपमा छानविन गरी दोषी उपर कार्वाहीको माग गरेको छ ।

शाखाको शनिबार घोराहीमा सम्पन्न भएको नियमित बैठकले यस्तो माग गरेको हो । शाखा अध्यक्ष सविन प्रियाशनको अध्यक्षतामा सम्पन्न भएको बैठकले महासंघको २५ औ केन्द्रीय अधिवेशन सफल पार्न नैतिक, भौतिक सहयोग गर्नुहुने सम्पूर्ण संघ संस्था लगायत सबैमा धन्यवाद ज्ञापन गरेको छ ।

त्यसैगरी महासंघको आयोजनामा अशोज १० गते दशै मिलन कार्यक्रम गर्ने निर्णय समेत गरेको छ । बैठकले महासंघको केन्द्रीय अध्यक्षमा दाङ निवासी गोबिन्द आचार्य, र महासंघ दाङका साधारण सदस्य द्वय उपाध्यक्षमा विपुल पोख्रेल र सचिवमा उदय जि एम सहित सम्पूर्ण पदाधिकारी एवम कार्य समिति बधाई ज्ञापन गर्दै सफल कार्यकालको कामना गरेको पत्रकार महासंघ दाङका सहसचिव गोकर्ण पौडेलले जानकारी दिनभुएको छ ।