तुलसीपुर सरसफाई अनुगमन गर्न समिति गठन

शरद रेग्मी
तुलसीपुर, १५ चैत । तुलसीपुर उद्योग वाणिज्य संघ र तुलसीपुर उपमहानगरपालिकाका संयुक्त आयोजनामा चल्दै आएको क्लिन तुलसीपुर, ग्रीन तुलसीपुर अभियानको ३२ औ साता पुगेपछि मंगलवार अभियानको अनुगमन समिति गठन गरिएको छ ।

तुलसीपुर उद्योग वाणिज्य संघका अध्यक्ष तथा सरसफाई अभियानका संयोजक विमल रिजालको अध्यक्षतामा बसेको बैठकले नागरिक समाजका संयोजक टिकाराम रेग्मीको संयोजकत्वमा सात सदस्यीय अनुगमन तथा मुल्यांकन समिति गठन गरिएको हो । समितिमा तुलसीपुर सरोकार मन्चका संंयोजक गोपिनाथ योगी सदस्य रहेका छन् ।

त्यसैगरी पदेन सदस्यहरुमा तुलसीपुर उपमहानगरपालिका, यातायात व्यवसायी, पत्रकार र तुलसीपुर नगर जेसीस संस्था रहेका छन् । तुलसीपुर उद्योग वाणिज्य संघको सभाहलमा मंगलवार बसेको सर्वदलिय÷सर्वपक्षिय बैठकले यो समिति गठन गरेको हो । समीतीले अनुगमन र मुल्यांकनको काम मंगलवारैदेखि थालेको छ ।

अनुगमनका क्रममा सरसफाइ अभियानमा सहयोग गर्नेहरुलाई पुरस्कारको व्यवस्थासंगै अवरोध गर्नेहरुलाई दण्डको समेत सिफारीस गर्ने बताइएको छ । त्यसैबीच मंगलवार ३२ औं सरसफाइ सप्ताहको सुभारम्भ साविक तुलसीपुर नगरपालिकाका पुर्वउपमेयर घनश्याम पाण्डेले गरेका छन् ।