दाङ । निजी क्षेत्रका सञ्चारमाध्यम र सञ्चारकर्मीमाथि सरकारले गरेको विभेदकारी निर्णयको विरोधमा नेपाल पत्रकार महासंघ दाङ शाखाको अगुवाइमा जिल्लाका सम्पूर्ण क्रियाशील पत्रकारहरूले जिल्ला प्रशासन कार्यालय दाङ अगाडि एक घण्टा धर्ना दिएका छन् ।
नेपाल पत्रकार महासंघ केन्द्रीय समितिको सर्कुलरअनुसार देशव्यापी आन्दोलन कार्यक्रमअन्तर्गत दाङमा पनि धर्ना कार्यक्रम आयोजना गरिएको हो। कार्यक्रम अनुसार पत्रकारहरुले विहान ११ बजेदेखि १२ बजेसम्म जिल्ला प्रशासन कार्यालय अगाडि धर्ना दिएका थिए ।
पत्रकारहरूले सरकारले विज्ञापन तथा सार्वजनिक सूचनामाथि नियन्त्रण कायम गर्न खोजेको भन्दै उक्त निर्णय प्रेस स्वतन्त्रता र स्वतन्त्र सञ्चारमाध्यममाथिको हस्तक्षेप भएको बताएका छन्। उनीहरूले सञ्चार क्षेत्रलाई कमजोर बनाउने तथा निजी मिडियाको अस्तित्वमाथि नै चुनौती सिर्जना गर्ने निर्णय तत्काल सच्याउन सरकारसँग माग गरेका छन्। धर्ना कार्यक्रममा पत्रकार महासङका केन्द्रीय सचिव सविन प्रियासन, महासघ दाङ अध्यक्ष सन्तोष सुवेदी पुर्व अध्यक्ष केएल बुढाथोकी लक्ष्मी आचार्य लगायत अन्य पत्रकारहरुको सहभागिता थियो ।
धर्ना कार्यक्रममा सहभागी पत्रकारहरूले सरकार आफ्नो निर्णयबाट पछि नहटे र माग सम्बोधन नभएसम्म आन्दोलनका कार्यक्रमलाई निरन्तरता दिने चेतावनी दिएका छन्। साथै, प्रेस स्वतन्त्रता, नागरिकको सुसूचित हुने अधिकार तथा स्वतन्त्र पत्रकारिताको संरक्षणका लागि एकजुट भएर संघर्ष जारी राख्ने प्रतिबद्धता व्यक्त गरेका छन्।
यसैबिच सरकारको स्वच्छाचारी निर्णयविरुद्ध दाङमा संकलन गरिएको हस्ताक्षर सरकारलाई पठाइएको छ । दाङका सहायक प्रमुख जिल्ला अधिकारी सावित्रा पुनलाई बुझाइएको हो ।