इन्द्रेणी संवाददाता
दाङ । पुस्तक तथा स्टेशनरी व्यवसायी समिति दाङको २७ औं वार्षिक साधारणसभा तथा १३ औं अधिवेशन शनिवार घोराहीमा सम्पन्न भएको छ । साधारणसभा तथा अधिवेशनको उद्घाटन कार्यक्रममा बोल्ने वक्ताहरुले पुस्तक तथा स्टेशनरी व्यवसाय शैक्षिक तथा बौद्धिक क्षेत्रसँग जोडिएको व्यवसाय भएको भन्दै यसलाई मर्यादित बनाउन आवश्यक रहेको बताएका थिए ।
कार्यक्रममा विशिष्ट अतिथि नेपाल पुस्तक तथा स्टेशनरी व्यवसायी महासंघका उपाध्यक्ष बुद्धप्रसाद अधिकारीले महासंघ पुस्तक तथा स्टेशनरी व्यवसायीहरूका अधिकार प्राप्ती र समस्या सामाधान गर्नका लागि लागिपरेको उल्लेख गर्दै यसका लागि जिल्लादेखि प्रदेश र केन्द्रसम्ममा व्यवसायिक एकता आवश्यक रहेको बताए । अर्का विशिष्ट अतिथि पुस्तक तथा स्टेशनरी व्यवसायी संघ लुम्बिनी प्रदेशका अध्यक्ष हेमानन्द शर्माले यो व्यवसायलाई व्यवसायिक मर्यादित राख्नका लागि व्यवसायीहरू नै जुट्नुपर्ने बताए । देशको अवस्थाका कारण पछिल्लो समयमा पुस्तक तथा स्टेशनरी व्यवसाय नै संकटमा पर्दै गएको भन्दै शर्माले सुधार गर्न सकिएन भने व्यवसायीहरू आफ्नो व्यवसायबाटै पलायन हुने अवस्था आउन सक्ने बताए ।
पुस्तक तथा स्टेशनरी व्यवसायी समिति दाङका वरिष्ठ उपाध्यक्ष सन्तोष आचार्यको स्वागत मन्तव्यबाट शुरु भएको कार्यक्रममा संस्थाको संगठानिक प्रतिवेदन सचिव प्रेम प्रकाश डिसीले प्रस्तुत गरेका थिए । कार्यक्रममा दाङमा पुस्तक तथा स्टेशनरी व्यवसायीहरूलाई संगठित गर्ने तदर्थसमितिका पदाधिकारी एवं सदस्यहरु, संस्थापक पदाधिकारी एवं सदस्यहरूलाई दोसल्ला र प्रमाणपत्रसहित सम्मान गरिएको थियो । कार्यक्रमको सहजिकरण सचिव प्रेम प्रकाश डिसीले गरेका थिए । अधिवेशनले दुई वर्षका लागि नयाँ कार्यसमिति चयन गर्ने छ ।