इन्द्रेणी संवाददाता
दाङ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले आफू नेतृत्वको सरकारले केही फरार अभियुक्तहरूलाई गिरफतार गरेपछि एमाले र कांग्रेसको नेतृत्वमा पैदा भएको डरका कारण वर्तमान सरकार बनेको बताएका छन् ।
आज शुक्रवार दाङको तुलसीपुरमा आयोजना गरिएको माओवादी केन्द्रको नगर अधिवेशन तथा खबरदारी सभालाई सम्बोधन गर्दै उनले यस्तो बताएका हुन् । सामान्यतया लोकतन्त्रमा कहीँ कतैपनि सदनका पहिलो र दोस्रो दल मिलेर सरकार नबनाइने भन्दै उनले यसलाई नेपालमा भएको गाइजात्राको संज्ञा दिए ।
‘संसारमा कहीँ नहुने हाम्रो नेपालमा पनि कहीँ नहुने जात्रा हाँडिगाउँमा भन्याजस्तो सदनमा भएको पहिलो र दोस्रो पार्टीको सामान्यतया संसदीय लोकतन्त्रमा मिल्ने गर्दैनन् मिल्दैनन् । चाहे अमेरिकामा होस्, चाहे युरोपमा होस, चाहे भारतमा हिन्दुस्थानमा कहिपनि पहिलो र दोस्रो पार्टी मिलेर सरकार बनेको देख्दैनौं र बनाउदैनन् पनि… । तर, त्यो गाइजात्रा नेपालमै भयो, माओवादी नेतृत्वको सरकारका विरुद्ध भयो’, उनले भने, ‘त्यो लोकतन्त्रको मर्मविपरित भयो, यो सरकार जो गठन भयो, यो सरकार बन्नुको कारण कहर हो, एमाले नेतृत्व र कांग्रेस नेतृत्वभित्र पैदा भएको डर हो, अब हाम्रो पालो आयो भन्ने देखे उनीहरुले, हामीले केही फरार अभियुक्तहरूलाई गिरफतार गर्ने वित्तिकै अबको पालो मेरो भन्नेमा पुगेपछि उनीहरु लोकतन्त्रका विरुद्ध, जनताका विरुद्ध र संविधानका विरुद्ध गठबन्धन गर्न पुगे ।’
