चिकित्सा क्षेत्र सुधारसहित अख्तियार प्रमुख लोकमानसिंह कार्कीमाथि महाअभियोगको माग सहित १६ दिनदेखि आमरणअनसनरत डा. गोविन्द केसीले आज अनसन तोड्नु भएको छ । स्वास्थ्य सचिव डा. सेनेन्द्रराज उप्रेतीसहित अन्य तीन जना बिरामीको हातबाट जुस पिएर केसीले अनसन तोड्नु भएको हो ।
डा केसीका प्रतिनिधि र स्वास्थ्य सचिव उप्रेती संयोजकत्वको सरकारी वार्ता टोलीबीच सहमति भएपछि आज अनसन तोडिएको हो । अख्तियार प्रमुख कार्कीमाथि महाभियोग लगाउनुपर्ने माग भने आफ्नो दायरा भित्र नपर्ने भन्दै सरकारी वार्ता टोलीले छलफल अस्वीकार गरेको थियो । चिकित्सा शिक्षाको स्तरीयता, विद्यार्थी भर्नामा पारदर्शिता, केन्द्रीय प्रवेश परीक्षा प्रणाली, सरकारी शिक्षण संस्थामा चिकित्साशास्त्र अध्ययनका लागि ७५ प्रतिशत विद्यार्थीका लागि क्रमशः छात्रवृत्ति उपलब्ध गराउने र प्रत्येक प्रदेशमा कम्तीमा एकएक मेडिकल कलेज सञ्चालन गर्ने सहमति दुवै पक्षबीच भएको छ ।
सम्झौताअनुसार काठमाडौं उपत्यकामा आगामी १० वर्षसम्म नयाँ मेडिकल, डेन्टल र नर्सिङ कलेजलाई सम्बन्धनका लागि मनसायपत्र नदिने र मनसायपत्र पाइसकेका कलेजलाई सञ्चालन अनुमति नदिन पनि सरकार सहमत भएको छ । मनमोहन स्वास्थ्य विज्ञान प्रतिष्ठ लाई सरकारको स्वामित्वमा रहेको चिकित्सा विज्ञान राष्ट्रिय प्रतिष्ठान (न्याम्स)ले सञ्चालन गर्ने प्रस्तावमा डा.केसी सहमत हुनु भएको छ ।