रेखासँग १९६ मतान्तरले पराजित भए एमाले महासचिव शंकर पोख्रेल

इन्द्रेणी संवाददाता
दाङ, ८ मंसिर । दाङ क्षेत्र क्षेत्र नम्बर २ बाट प्रतिनिधिसभा सदस्यका लागि उम्मेदवार बनेका नेकपा एमालेका महासचिव शंकर पोख्रेल पराजित भएका छन् । एमालेका हेविवेयट नेताका रुपमा चिनिने पोख्रेल नेकपा माओवादी केन्द्रकी उम्मेदवार रेखा शर्मासँग झिनो मतान्तरले पराजित भएका हुन् ।

सत्ता गठबन्धनका तर्फबाट उम्मेदवार भएकी शर्माले २६ हजार ८७७ मत प्राप्त गरिन् । उनका निकटम प्रतिस्पर्धी एमालेका उम्मेदवार पोख्रेलले २६ हजार ६८१ मत प्राप्त गरे । मतगणनको सुरुवाती चरणमै अग्रता कायम गर्दै आएकी शर्माले १९६ मतान्तरले पोख्रेललाई पराजित गरेकी हुन् । पोख्रेल पार्टीको महासचिव एवं एमालेका हेविवेयट नेताका रुपमा भएकाले पनि शर्मा र पोख्रेलको प्रतिस्पर्धालाई निकै चासोको रुपमा हेरिएको थियो ।

एमालेका महासचिव पोखरेल लुम्बिनी प्रदेशका पहिलो मुख्यमन्त्री हुन् । २०७० को निर्वाचनमा दाङबाट हारेका उनले २०७४ को निर्वाचनमा एमाले/माओवादी गठबन्धनबाट प्रदेश सांसद जितेका थिए । पोख्रेल २०६४ मा समानुपातिकबाट सांसद बनेका थिए भने २०५१ मा पहिलो पटक सांसद बनेका पोखरेलले २०५६ मा भने निर्वाचन पराजित भएका थिए । उनी एमालेमा वौद्धिक नेताका रुपमा पनि परिचित छन् ।