काठमाडौं, २२ पुस । छिमेकी भारतमा एक सातामा कोरोना संक्रमण पाँच गुणाले बढेको छ, तर नेपाली नाकामा परीक्षण नगन्य छ, दैनिक भित्रिने हजारौँ नागरिक बेफिक्री गाउँगाउँ पुगिरहेका छन्
भारतीय नाका हुँदै स्थलमार्ग र हवाईमार्गबाट आउनेहरू संक्रमित भेटिएका छन् । उनीहरूमा एस जिन नेगेटिभ देखिएको छ । यसको अर्थ ओमिक्रोन नै हो भन्ने हो । अहिलेको अवस्था हेर्दा जनवरीको अन्तिमतिर नेपालमा संक्रमण बढ्ने अनुमान छ ।
नेपालमा १४ पुसमा दुई सय २० नयाँ संक्रमित पुष्टि भएकामा २१ पुसमा चार सय ३५ जनामा संक्रमण देखिएको छ । संक्रमितको संख्या मात्रै होइन, संक्रमणदर पनि झन्डै दोब्बरले नै बढेको छ । दुई सय २० जनाको पजिटिभ रिपोर्ट आएको अघिल्लो बुधबार सात हजार ६ सय आठको नमुना परीक्षण भएको थियो, जुन संक्रमणदर २.८९ प्रतिशत हुन्छ । बुधबार चार सय ३५ मा संक्रमण पुष्टि हुँदा भने १० हजार दुई सय ६९ नमुना परीक्षण भएको थियो, जुन संक्रमणदर ४.२३ प्रतिशत हुन्छ ।
दुई साताअघिको तथ्यांकसँग तुलना गर्दा नेपालमा संक्रमण थोरै–थोरै गर्दै निरन्तर बढेको देखिन्छ । ४ पुसमा नौ हजार आठ सय ७२ नमुना परीक्षण गर्दा एक सय ८१ मात्रै पजिटिभ देखिएका थिए, जुन संक्रमणदर १.८३ प्रतिशत मात्रै हुन्छ । नयाँ पत्रिकाबाट