काठमाडौं, २४ भदौ। नेपाल आयल निगमले पेट्रोल र मट्टितेल एउटै पाइपलाइनबाट ल्याउन प्रक्रिया थालेको छ । यसका लागि निगमले भारतीय आयल कर्पोरेसनकै सहयोगमा प्रक्रिया अघि बढाइसकेको छ । अहिलेसम्म पाइपलाइनबाट डिजेल मात्रै आयात हुँदै आएको थियो ।
त्यसैगरी नेपाल–भारत अन्तरदेशीय पेट्रोलियम पाइपलाइन सञ्चालनमा आएको दुई वर्ष पूरा भएको छ । आयल निगमले भारतीय आयल कर्पोरेसनको सहयोगमा भारतको मोतिहारीदेखि नेपालको अमलेखगञ्जसम्मको ७९ किलोमिटर पाइपलाइन निर्माण गरेर २०७६ भदौदेखि पाइपलाइनबाट पेट्रोलियम पदार्थ भित्र्याउन शुरु गरेको हो । पाइपलायन शुरु भएपछि दुई वर्षमा ३ अर्ब रुपैयाँ बचत भएको निगमले जनाएको छ ।
दुई वर्षको अवधिमा पाइपलाइनबाट १ अर्ब ६१ करोड लिटर डिजेल आयात गरिएको छ । आर्थिक वर्ष २०७६ ७७ मा ४८ करोड ८५ लाख लिटर, आव २०७७र ७८ मा १ अर्ब ३१ तथा चालू आवको हालसम्ममा १२ करोड ४४ लाख डिजेल आयात भएको निगमका कार्यकारी निर्देशक सुरेन्द्र पौडेलले जानकारी दिए। निगमले सोही पाइपलाइनबाट दैनिक १ लाख ५० हजार किलोलिटर डिजेल आयात गर्दै आएको छ ।