देशका धेरै ठाउँमा झरी पर्ने, तटीय क्षेत्रमा सतर्कता अपनाउन आग्रह

काठमाडौं, ११ साउन । देशका धेरै ठाउँमा बुधवारसम्म झरी पर्ने भएको छ । मौसम पूर्वानुमान महाशाखाका अनुसार केही ठाउँमा ठूलो पानी पर्ने भएकाले सावधानी अपनाउन आग्रह गरिएको छ।

आज सुदूरपश्चिमका केही ठाउँमा र भोलि प्रदेश १, वाग्मती, गण्डकी, कर्णाली र सुदूरपश्चिमका केही ठाउँमा ठूलो पानी पर्ने सम्भावना रहेको महाशाखाले जनाएको छ । धेरै ठाउँमा गएरातिदेखि नै पानी परिरहेको छ ।

महाशाखाले पहाडी भू–भागमा भूक्षय, पहिरो तथा गेग्रान बहावको जोखिम रहेको हुनाले नदीनाला र खहरे खोलामा पानीको सतह बढ्न सक्ने भन्दै आवश्यक सतर्कता अपनाउन अनुरोध गरेको हो ।