इन्द्रेणी संवाददाता
काठमाडौं, १९ मंसिर । सरकार भ्रष्टाचारमा लिप्त भएको आरोप लागिरहेका वेला प्रधानमन्त्री केपी शर्मा ओलीले भ्रष्ट सोचाइ भएकाले मात्रै जे काममा पनि भ्रष्चार भएको देख्ने गरेको बताएका छन् ।
“एकथरिलाई सबै काममा भ्रष्टाचार हुन्छ भन्ने लागेको छ । ती भ्रष्ट सोचाइ भएकाले भ्रष्टाचार नहुने कुरा पत्याउँदैनन् । पेट र मुख छ भन्दैमा जेमा पनि, जे पनि हसुर्नु हुँदैन । त्यस्तो भएमा गाईभैँसी र मान्छेमा भिन्नता हुँदैन । त्यस्ताले विकास निर्माणमा उल्झन ल्याउँछन्”, उनले भने ।
प्रधानमन्त्री ओलीले राष्ट्रिय गौरवको काठमाण्डौ–तराई–मधेस द्रुतमार्गको प्रवेशविन्दु ललितपुरको खोकनाको जग्गाको मुआब्जा विवादमा सरकारलाई संस्कृति र जातविरोधी चित्रण गरेर आफ्ना निहित फाइदा उठाउनेलाई सम्झाइबुझाइ गर्नुपर्ने बताए ।
विकास निर्माणका काममा क्षणिक राजनीतिक स्वार्थका आधारमा सिर्जना गरिने जातीय र सांस्कृतिक नामका अन्तर्विरोधले देशको विकास र एकतामा आघात पर्ने भएकाले त्यसो नगर्न उनले सम्बन्धित पक्षलाई आग्रह समेत गरे ।