सरकारले जग्गा प्लटिङ खोल्यो, खेतीयोग्य जमिन मासिने चिन्ता

इन्द्रेणी संवाददाता
काठमाडौं, २२ भदौ । झण्डै तीन वर्षपछि सरकारले जग्गाको कित्ताकाट खुल्ला गरेको छ । जग्गाको कित्ताकाट बढ्दा खेतीयोग्य जमिन नासिएको भन्दै  २०७४ सालदेखि बन्द रहेको जग्गाको कित्ताकाट झण्डै तीन वर्षपछि खुल्ला गरिएको हो ।

भूमि व्यवस्था, सहकारी तथा गरिबी निवारण मन्त्री पद्माकुमारी अर्यालले गएको बिहीबार जग्गाको कित्ताकट खुला गर्ने निर्णय गरेकी थिइन् । कित्ताकाट खुलेपछि जग्गा व्यवसायीमा त खुशी छाएको छ तर उत्तीकै खेतीयोग्य जमिन मासिने चिन्ता पनि बढेको छ ।

भू–उपयोग नियमावली जारी भइ भू–उपयोग नक्सार डाटा तयार गरी पालिकालाई हस्तान्तरण भएपछि लागू हुने गरी अहिलेका लागि खण्डीकरण गर्न अनुमति दिइएको महाशाखाले जनाएको छ । यो निर्णयसँगै देशभर रहेका जग्गाको कित्ताकाट गर्न पाइने छ ।

यसअघि जग्गाको कित्ताकाट बढ्दा खेतीयोग्य जमिन नासिएको भन्दै मन्त्रालयले कित्ताकाट बन्द गरेको थियो । जग्गा व्यवसायीले जथाभावी रुपमा जग्गा खण्डीकरण गर्दा पछिल्लो समयमा खेतीयोग्य जमिन नासिदै गएको छ ।