इन्द्रेणी संवाददाता
दाङ, २० कार्तिक । नेपाल कम्युष्टि पार्टी (नेकपा) का अध्यक्ष पुष्पकमल दाहाल ‘प्रचण्ड’ ले यो सरकार पाँच वर्ष चल्ने बताएका छन् । प्रेस संगठन दाङले आज विहान घोराहीमा आयोजना गरेको पत्रकार भेटघाटमा अध्यक्ष प्रचण्डले जसले जे हल्ला फैलाएपनि यही सरकार पाँच वर्ष चल्ने बताएका हुन् ।
परिवर्तनमा दाङले खेलेको भूमिकाको स्मरण गर्दै प्रचण्डले यो जिल्लालाई संमृद्धि र विकासमा धेरै फड्को मारिसकेको उल्लेख गर्दै अझ विकास संमृद्धिका लागि गर्नुपर्ने काम धेरै रहेको बताए । उनले दाङ प्रदेश नम्बर ५ को सम्भावित राम्रो ठाउँ भएकाले प्रदेश राजधानीको लागि पनि सभावना भएको बताए । उनले प्रदेश ५ को महत्वपूर्ण जिल्ला बनाउन आफूले पहिले पनि पहल गरेको र अबका दिनहरुमा पनि पहल गर्ने बताए ।
निवर्तनमान सभामुख कृष्णबहादुर महराको विषयमा सञ्चारकर्मीहरुले उठाएको जिज्ञासामा महराले मोरल त्रुटि गरेको र त्यो विषय अहिले अदालती प्रक्रियामै रहेकाले राजीतिक ढंगबाट बोल्न नहुने बताए । ‘घटना क्रमलाई बुझदा महराजीले नैतिक मोरल त्रुटि गर्नुभएको देखिन्छ’, उनले भने, ‘अहिले यो विषय अदालती प्रक्रियामा छ स्वतन्त्र र निष्पक्ष रुपमा छानविन हुन्छ राजनीतिक ढंगबाट यसलाई हेरिनुहुदैन ।’
यसैबीच दाङ जिल्ला उद्योग वाणिज्य संघको टोलीले अध्यक्ष प्रचण्डलाई स्वागत गरेको थियो । अध्यक्ष रानारयण भुसाललगायतको टोलीले प्रचण्डलाई स्वागत गरेको थियो । प्रचण्ड आज तुलसीपुरमा हुन लागेको कार्यकर्ता प्रशिक्षण कार्यक्रममा सहभागी हुन दाङ आएका हुन् ।