काठमाडौँ, ९ पुस । अत्याधुनिक प्रविधिको प्रयोगबाट उपचार हुने महँंगा र सुविधासम्पन्न कतिपय अस्पतालले अस्पतालजन्य फोहोर जथाभावी फालेपछि सरकारले त्यस्ता अस्पताललाई कारवाही गर्ने भएको छ ।
अस्पतालजन्य फोहोरलाई सोझै नगरपालिकाको फोहोर उठाउने गाडीमा फाल्ने, सडकका छेउछाउमा जम्मा पारेर खुला छाड्ने, सङ्क्रमित पानीलाई सोझै ढलमा मिसाउने गरिएको पाइएकाले उपत्यकाका १८ वटा अस्पताल कारवाहीको सूचीमा रहेको जनाइएको छ गोरखापत्रमा खबर छ ।
विभागका अनुसार अस्तापल सञ्चालन गरेको वर्षौं भएपनि हालसम्म वातावरण संरक्षण ऐनले निर्धारण गरेको वातावरणीय प्रभाव मूल्याङ्कन समेत नगरेका ती अस्पताललाई वातावरण ऐन अनुसार कारवाहीका लागि वन तथा वातावरण मन्त्रालयमा सिफारिस गरेर पठाइएको वातावरण विभागका महानिर्देशक झलकराम अधिकारीले बताए ।
उनले नर्भिक इन्टरनेशनल अस्पतालको नाम लिँदै त्यस्तोे ख्याति प्राप्त अस्पतालले समेत आफ्नो सङ्क्रमित फोहोर सोझै महानगरपालिकाको गाडीमा फाल्ने गरेको, यस्तो सङ्क्रमित फोहोरले गाडी र पुरै ल्याण्डफिल साइट नै सङ्क्रमित हुने तथा महामारी फैलिन सक्ने सम्भावना औंल्याए ।
महानिर्देशक अधिकारीका अनुसार ती अस्पतालले सङ्क्रमित पानीलाई पनि सोझै ढलमा मिसाएको पाइएको छ । ढल त टाढासम्म बग्छ, फेरि हाम्रो ढल पनि व्यवस्थित छैन, ढल फुट्ने समस्या निकै बढी भएकाले त्यो सङ्क्रमित पानीले समाजमा रोगको सङ्क्रमण फैलाउन पनि सक्छ ।