डुबेर वेपत्ता भएका तीन बालकको अवस्था अझै अज्ञात

सोलुखुम्बु, २३ साउन । गोक्यो हिमतालमा पौडी खेल्ने क्रममा हराइरहेका तीन जना विद्यार्थी नभेटिएपछि खोजीका लागि शसस्त्र प्रहरीका पाँच जना गोताखोरको टोली त्यहाँ पुगेको छ । मौसम प्रतिकूल भएपछि हेलिकोप्टर जान नसक्दा गोतोखोरको टोली हिँडेर नै ताल पुगेको छ ।

प्रमुख जिल्ला अधिकारी नरेन्द्र रानामगरले चार दिनदेखि तालमा डुबेका बालकहरूको अवस्था अझै अज्ञात रहेको बताउँदै गोताखोर टोलीले वुधबारबाट मात्र खोजी कार्य गर्ने जानकारी दिए । आजको गोखापत्रमा खबर छ- खुम्जुङ माध्यमिक विद्यालयको कक्षा ९ मा अध्ययनरत विद्यार्थीलाई शैक्षिक भ्रमणका क्रममा विश्व रामसार सूचीमा सुचिकृत गोक्यो क्षेत्र लगिएको थियो । सोही क्रममा तालमा पौडी खेल्दै गर्दा पेम्बा दोर्जी शेर्पा, सुनिल बराइली र पेम्बा नुरु शेर्पा डुबेका थिए ।

शुन्य डिग्री सेल्सियस तापक्रममा रहने उक्त तालमा यति लामो समयसम्म नभेटिएपछि ती बालकहरु जीवित भेटिने आश मरिसकेको स्थानीयको भनाइ छ । गोक्यो हिमताल समुन्द्री सतहबाट चार हजार ७५० मिटरको उचाईमा पर्दछ । हाइ अल्टीच्युटमा रहेको हिमताल भएका कारण यहाँको तापक्रम सँधै माइनस २ डिग्री सेल्सियस भन्दा कम हुन्छ ।