हामी सरकार ढाल्दैनौं तर छोड भने छोडिदिन्छौं : प्रचण्ड

काठमाडौं, २१ असोज । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले अहिले आफूहरु सरकार ढाल्ने पक्षमा नभएको बताएका छन् । माओवादी केन्द्रको संसदीय बैठकमा बोल्दै अध्यक्ष प्रचण्डले सरकार तत्काल सरकार नढाल्ने तर सत्ता साझेदार नेपाली काग्रेसले सरकार छोड भने छोडिदिने बताए ।

अध्यक्ष प्रचण्डले अहिलेको एमालेसहितको वाम एकता सरकार ढाल्नका लागि नभए मुलुकलाई अघि वढाउनका लागि भएको जिकिर गरे । ‘हाम्रो एमालेसँगको चुनावी तालमेल सरकार ढाल्नका निम्ती होइन, यो तालमेलले देशलाई उन्नतीको बोटोतर्फ लैजान्छ भन्ने हामीले ठानेका छौं’, उनले भने । एमलेसँग पार्टी एकता समेत गरेर नेपालमा एउटै कम्युष्टि पार्टी बनाउने अभियानमा आफूहरु लागेको पनि प्रचण्डले बताए ।

तर एमाले र नयाँ शक्तिसँग वैचारिक कार्यदिशाको विषयमा भने छलफल बाँकी रहेको र अहिले पार्टी एकताको सैद्धान्तिक सहमति मात्रै भएको उनले बताए । कार्यदिशाको विषयमा चुनावपछि छलफल गरिने प्रचण्डको भनाइ छ ।