भदौ १०, धनगढी । पूर्व प्रधानमन्त्री तथा माओवादी केन्द्रका अध्यक्ष पुष्पकमल दाहाल ‘प्रचण्डले आफूलाई समाजवादी क्रान्ति देखेर मर्न मन भएको बताउनु भएको छ ।
माओवादी केन्द्र प्रदेश नं. ७ को पार्टी प्रशिक्षण कार्यक्रममा बोल्दै अध्यक्ष प्रचण्डले भन्नुभयो, ‘हामी हाम्रो रणनीतिबाट बिचलित भएका छैनौं । समाजवादउन्मूख संघीय गणतान्त्रिक संविधान बनाएका छौं । देशलाई राजनीतिक स्थिरता दिएर आर्थिक समृद्धिलाई हामीले नै नयाँ उचाईमा लैजान सक्छौं । माओवादी आन्दोलनलाई फेरी एकतावद्ध गरेर समाजवादी क्रान्तिको नेतृत्व गर्ने मन छ । दश वर्षभित्र फेरी समाजवादी क्रान्तिको उभार ल्याउन सक्छौं । मलाई समाजवादी क्रान्ति देखेर मात्र मर्न मन छ, प्रचण्ड त्यत्ति छिटै थाक्ने मान्छे होइन ।’
देशमा प्रमूख कार्यकारी राष्ट्रपति अपरिहार्य रहेकोमा उहाँले जोड दिनुभयो । प्रचण्डले भन्नुभयो, ‘देशमा जहिले पनि राजनीतिक अस्थिरता । २०४६ सालपछि त स्थीरता आउँछ कि भनेको भएन, गणतन्त्रपछि आउँछ कि भनेको आएन, नयाँ संविधानपछि राजनीतिक स्थीरता हुन्छ कि भनेको त्यो पनि भएन । २ वर्षमा ३ वटा सरकारले देशको विकास र समृद्धि सम्भव नै छैन । त्यसैले जनता आफैले प्रत्यक्ष भोट हालेर चुन्ने प्रत्यक्ष निर्वाचित कार्यकारी राष्ट्रपति चाहिन्छ । यसले मात्रै देशलाई एकतावद्ध गर्छ, आर्थिक समृद्धि र विकासलाई गति दिन सक्छ ।’
प्रशिक्षणमा अध्यक्ष प्रचण्डले एमालेले कहिल्यै पनि परिवर्तन र क्रान्तिको नेतृत्व नगरेको बताउनु भयो । उहाँले भन्नुभयो, ‘मदन भण्डारी बाँचेको भए के हुन्थ्यो भन्न सकिन्नथ्यो । तर, अब त्यो सोच्नु पनि काल्पनिक हुन्छ । २००७ सालको क्रान्तिको नेतृत्व कांग्रेसले गर्यो, २०४६ सालको आन्दोलन पनि कांग्रेसले नै गर्यो, बामपन्थी शक्तिहरुको सहयोगी भूमिका भयो, जनयुद्ध र गणतन्त्रको नेतृत्व हामीले गर्याैं । देशमा ठूलो राजनीतिक परिवर्तन माओवादीले गर्यो । तर, एमालेले के गर्यो ? गणतन्त्रको आन्दोलनमा उनीहरु यसका विरोधी थिए, संघीयता पनि उनीहरुले रुचिले मानेका होइनन्, धर्मनिरपेक्षता, समावेशी, समानुपातिक त झन् मन नै पराउँदैनन् ।’
‘सबै माओवादीहरु एकै ठाउँ आउनुको कुनै बिकल्प छैन’, अध्यक्ष प्रचण्डले भन्नुभयो, ‘वैद्यजी चुनाव लड्नु भो, बाबुरामजी पनि लड्नु भो । फरक तरिकाले भए पनि विप्लवजी चुनाव लड्नुभो । तर, जनताले तिमीहरुको कुनै अर्थ छैन भन्ने जनादेश दिए । हामीलाई पनि जनताले सबै माओवादीलाई मिलाउने जिम्मा तिम्रो हो भन्ने जनादेश दिए । तसर्थ, जनताको अभिमत बुझेर सबै माओवादी एक हुनुको कुनै बिकल्प छैन ।’
प्रशिक्षणमा माओवादी केन्द्रका नेता नारायणकाजी श्रेष्ठ प्रकाशले आफूहरु एकताको सन्देश दिन धनगढी आएको बताउनुभयो । ‘अध्यक्षले नै प्रशिक्षण दिने भएपछि मैले बोल्नु खासै केही छैन । तर, हामीले पार्टीभित्र सुदृढ एकता पैदा गरेका छौं, हाम्रा बीचमा कुनै बिमति, विवाद र समस्या छैन’, नेता श्रेष्ठले भन्नुभयो, ‘एकताको सन्देश दिन मात्रै म तपाईहरुको बीचमा उभिएको छु । हामी सुदृढ एकतासहित माओवादी आन्दोलनलाई नयाँ उचाईमा उठाउँछौं ।’
अर्का नेता रामबहादुर थापा ‘बादल’ले जनतासँगको सम्बन्ध सुदृढ गरेर माओवादीलाई विजयी बनाउनुपर्ने बताउनु भयो । नेता बादलले भन्नुभयो, ‘हामीसँग जनमत छ, मुद्धा र नेतृत्व पनि छ । तर, यस बीचमा जनतासँगको हाम्रो सम्बन्ध अत्यन्तै फितलो भयो । अब हामी यसलाई सच्चाउँछौं र माओवादी आन्दोलनलाई सुदृढ गर्छाैं ।’
कार्यक्रममा माओवादी नेताहरु लेखराज भट्टले प्रदेशको योजनाबारे बोल्नुभएको थियो । प्रशिक्षणमा सात नम्वर प्रदेशका ५०० अगुवा कार्यकर्ताको उपस्थिति रहेको थियो ।