दिपक बोहरा
तुलसीपुर । दाङका तीन अस्पतालमा सेवा सुदृढीकरणका लागि थप बजेट बिनियोजन भएको छ । स्वास्थ्य मन्त्रालयले सेवा सुदृढिकरणका लागि दाङमा दुई करोड २० लाख बजेट बिनियोजन गरेको जनाएको छ ।
स्वास्थ्यमन्त्रीका प्रमुख सल्लाहकार प्रताप पौडेलका अनुसार दाङको राप्ती अञ्चल अस्पताल तुलसीपुर र राप्ती उपक्षेत्रीय अस्पताल घोराहीमा ८०/८० लाख र लमही अस्पताललाई ६० लाख बजेट बिनियोजन गरेको हो । उक्त बजेट भौतिक पूर्वाधारको सुधार र मर्मतमा खर्च सकिने छ । स्वास्थ्य मन्त्रीका प्रमुख सल्लाहकार पौडेलका अनुसार निर्वाचन आचारसंहिता लाग्नु भन्दा अगाडि नै सुनिश्चित भएको उक्त बजेट प्रक्रिया पूरा गर्दै अस्पतालहरुमा अख्तियारी दिन सुरु भएको छ ।
बजेट अस्पतालले उपकरण खरिद तथा नयाँ संरचना निर्माणमा खर्च गर्न नपाईने उनले बताए । मन्त्रालयले देशभरिका एक सय दुई वटा अस्पतालको सेवा सुदृढीकरणका लागि ७१ करोड ३५ लाख रुपैयाँ विनियोजन गरेको छ । मन्त्रालयले अञ्चल अस्पतालदेखि जिल्ला अस्पतालसम्मको सुधारका लागि थप बजेट छुट्टाएको हो । मन्त्रालयले आवश्यकता र मागलाई ध्यानमा राखेर अस्पताललाई २० लाखदेखि एक करोड ८० लाख रुपैयाँसम्म बजेट पठाएको पौडेलले वताए ।
सरकारी अस्पतालहरु फोहोरी र दुर्गन्धित हुने गरेको गुनासो आएपछि मन्त्रालयले सरकारी अस्पताललाई आकर्षक र सुन्दर बनाउँदै बिरामी मैत्री बनाउन रकम पठाएको बुझिएको छ । लमही अस्पतालका निमित्त मेडिकल सुपरिटेण्डेण डा. ईश्वरी खनालले अस्पतालमा भौतिक पूर्वाधारको सुधार र मर्मतका लागि बजेट आएसंगै अस्पतालको ब्यबस्थापनमा सहज हुने वताए ।
स्वास्थ्य मन्त्रालयले जिल्ला अस्पताल रुकुम, जिल्ला अस्पताल सल्यानमा जनही ६०/ ६० लाख, जिल्ला अस्पताल रोल्पा, जिल्ला अस्पताल प्युठानमा एक करोड बजेट बिनियोजन भएको छ ।