काठमाण्डौ, १७ जेठ
संसदमा प्रस्तुत हुनु अघि नै बजेट सार्बजनिक भएको विषयमा छानबिन गर्न संसदीय समिति गठनको माग गर्दै नेपाली कांग्रेसले दोस्रोपटक पनि संसद बैठक अबरुद्ध गरेको छ । बिहान ११ बजेको बैठक कांग्रेस सांसदहरुको अबरोधका कारण आधा घण्टाका लागि स्थगित गरिएको थियो ।
त्यसपछि बसेको बैठक पनि कांग्रेसका सांसदहरुले अबरुद्ध पारेका छन् । सभामुख ओनसरी घर्तीले दिउँसो साढे एक बजेसम्मका लागि बैठक स्थगित गरिएको जानकारी गराउनुभयो । दोस्रोपटकको बैठकमा बोल्दै कांग्रेस सांसद रमेश लेखकले संसदीय छानबिन समिति गठन नभएसम्म सदनको काम कारबाही अघि बढ्न नसक्ने बताउनुभयो ।
संसदमा प्रस्तुत हुनुभन्दा अघि नै पत्रिकामा बजेट सार्बजनिक गरेर सरकारले गम्भीर अपराध गरेको उहाँको भनाइ छ । बजेटमाथि छलफल गर्न पाउनु संसदको अधिकार भएको भन्दै लेखकले संसदमा पेश नभइकन बजेटलाई पत्रपत्रिकामा सार्वजनिक गर्नु गम्भीर अपराध भएको वताउनुभयो ।
आर्थिक वर्ष २०७३र७४ को बजेट सदनमा प्रस्तुत हुनुअघि नै एक दैनिक पत्रिकामार्फत् सार्बजनिक भएको भन्दै कांग्रेसले अर्थमन्त्री विष्णु पौडेलले नैतिकताको आधारमा राजीनामा दिनुपर्ने बताउँदै आएको छ । आर्थिक सूचनाहरु बजेट घोषणा अगावै बाहिर चुहिँदा आर्थिक अनुशासन उल्लंघन भएको र कर छल्नेहरुलाई सजिलो भएको कांग्रेस सांसदको आरोप छ ।
यसअघि आज बिहान संसद बैठक सुरु भएलगत्तै कांग्रेस र मधेसी मोर्चाका सांसदहरु उँभिएर विरोध जनाएका थिए । त्यसपछि बोल्ने पालो पाएका पूर्वअर्थमन्त्रीसमेत रहेका कांग्रेस सांसद रामशरण महतले सदनमा पेश गर्नुपहिले नै बजेट सार्बजनिक गरेर अर्थमन्त्रीले संसदको विशेषाधिकार माथि मानहानी गरेको आरोप लगाउनुभयो ।।